تجربتي مع عملية قص المعدة الحل النهائي للسمنة والوزن الزائد

السلام عليكم ورحمة الله
يقولون من طول الغيبات جاب الغنايم وانا اليوم جاية ومعايا موضوع فريد جدا من نوعه, انا اسميه موضوع العمر لانه فعلا شيء يتسوا مرة واحدة في العمر وما يتكرر ابدا
اكيد من عنوان البوست عرفتو ايش هو...
الموضوع ببساطة مشاركة لرحلتي مع السمنة والوزن الزائد وأخيرا قرار عملية تكميم او قص المعدة...
لكن أولا خلوني اعطيكم نبذة عن وزني على مر السنين
قبل الزواج كان وزني مثالي وحتى بعد الزواج بقي وزني على حاله لكن بعد الحمل دكتوري كانت ملاحضته اني نحيفة زيادة عن اللزوم وضروري اتغذى كويس ووزني يزيد شوية ... خرجت من عنده ما اهتميت ب كلامه وقعدت على روتيني لين الزيارة الثانية وكانت بعد شهر...
نفس الشيء اخذ الوزن ولقى انه اقل من الأول وجلس ينصحني لازم تاكلي لازم تتغذي ومن دا الكلام بس انا ايامها كانت نفسي مسدودة وطول الوقت حاسة بطعم معدني ف فمي مهههههما غسلت ما يروح لدرجة اني كنت اجرح لساني ولثتي من الغسيل بدون فائدة
لما حكيته قال هذا وحم وكتبلي ادوية وفاتح للشهية وفعععلا كان فاتح للشهية لاني بس داومت عليه صرت اكل بكميات كبيرة ووزني زاد بسرعة بس كنت أقول معليش بعد الولادة بنحف وفعليا بعد الولادة بدأ وزني ينزل تدريجيا لكن حملت مجددا وما مداني انزل شوية الا الاقيه بدأ يزيد اكثر من الأول ومجددا عدت السيناريو الأول لكن المرة هادي كانت الزيادة اكبر...
بعد كم شهر صرت اتضايق من شكلي وحاولت اسوي ريجيم لكن للأسف الإرادة صفر... وقتها قررت اني اتجه لدكتور ووقتها كنت ابغى اسوي بالونة المعدة وبدأت رحلتي في البحث عن الطبيب المناسب واستقريت على الدكتور عدنان صباحي...
اخذت موعد معاه في عيادته بالمشفى ولما قابلني قال الزيادة اللي عندك بسيطة والبالونة اختيار مناسب لكن بس نشيلها راح يرجع الوزن اللي نزل واكثر لان العملية حل مساعد لتغيير نمط الحياة لكن اذا الانسان ما غير أسلوب اكله ونشاطه ما كنه سوا حاجة وهذا الشيء خلاني أقوله طيب سويلي تكميم قال ما ينفع لان وزني زايد فقط وزيادة بسيطة ما ينفع معها تكميم ابدا واخر المقابلة قال ليش ما احولك على اخصايية التغذية بس انا رفضت وخرجت من عنده وانا استرجع كلامه وافكر هل اسويها ولا أحاول اسوي دايت وكان في النهاية القرار اني اسجل ف نادي مع دايت على أساس اجرب هل ممكن اغير نمط حياتي ولا ما اقدر وتم الامر...
(هذا هو النادي اللي سجلت فيه, اسمه قولدن جيم اليت)
المهم داومت شهرين في النادي ونزل وزني لكن الشهر الثالث دخل رمضان وبطلت اروح وبعده إجازة الصيف سافرنا ولما رجعت من السفر كل الوزن اللي نزلته كان رجع ثاني وهنا تأكدت تمام التأكد اني مستحيل اغير نمط حياتي وصار تفكيري كله في عملية التكميم لكن العائق انه ما زال وزني لا يسمح بالتكميم وبما اني كنت جدا مقتنعة بالعملية وابغى اسويها قررت ازيد وزني فبدأت اخذ راحتي بالاكل مررررا, صرت  اكل كميات كبيرة واكل طول الوقت وكل اللي تشتهيه نفسي واغلبه دهون وسكريات ونجحت الخطة وبدأ وزني يزيد بشكل كبير لين فيوم من الأيام كنا في فندق ولقيت عندهم ميزان في الحمام, وزنت نفسي لقيت اني وصلت 130 كيلو وهذا وزن كبير جدا...
رغم ذلك ما كنت حاسة وكل اللي كانو يشوفوني دايما ينصحوني اغير رأيي وما اسوي العملية والسبب ببساطة اني جدا طويلة وهذا الشيء خلاني ابين انحف من الواقع عكس لو وحدة قصيرة بسرعة بيان عليها الوزن الزايد ويصير شكلها زي أسطوانة الغاز...
لوووول سوري عالتشبيه بس هذا اللي جه ف بالي (ما اقصد اي اساءة طبعا)...
عموما وزني الزائد اتوزع على كامل جسمي وبما اني مرا طويلة هذا الشيء خلاني اصير ضخمة مو سمينة فمكان معين وهذا اللي كان يخدع الناس لما يشوفوني 
نرجع لمحور حديثنا ونكمل رحلة البحث عن حل نهائي للسمنة
زي ما سبق وذكرت اني بدأت ازيد وزني وبعد فترة رجعت اخذت موعد مع الدكتور ثاني ووقتها كان نقل من المشفى وفتح عيادته الخاصة في أبراج البدرية (هاذي صورة الاستقبال حق العيادة)...
لكن هاذي الزيارة كانت قبل ما يوصل وزني ل 130 ومجددا جلست مع الدكتور وراجع ملفي وكان توجهه الأول ربط المعدة او حلقة المعدة (هذا اسم العملية) وهنا انا تنحت شوية لان العملية هاذي ما كانت ضمن خياراتي اللي فكرت فيها وخرجت من عنده وبدأت رحلة البحث في النت عن عملية ربط المعدة بالحلقة وفنفس الوقت كنت المفروض ارجع للدكتور لكنه كان مسافر فترة وبعدها انا سافرت كم شهر وبعد الرجعة نقلنا بيت جديد...
الخلاصة اني وقتها ما كنت مستقرة وأجلت التفكير في العملية شوية ومرت الشهور بسرعة وما لحقت انتبه للزمن الا الاقي مرت سنة من اخر زيارة لي مع الدكتور وهنا وزني كان وصل أقصاه وخلاص رتبت اموري ونويت على العملية مباشرة لكن هاذي المرة بما اني كنت حازمة كانت الحيرة في الدكتور...
انتقلت من البحث عن العملية المناسبة للبحث عن الدكتور المناسب...
ادري انا متابعة مع الدكتور عدنان صباحي من البداية لكن كثرة القراءة تجيب الشكك وهذا السبب اللي خلاني انقلكم تجربتي الكاملة بالصور
حقيقة لما تدخلو قوقل وتكتبو بالعربية عملية تكميم المعدة, قص المعدة, بالون المعدة وحتى عملية التحوير واي شيء متعلق بالسمنة والوزن الزائد كل النتائج تكون في منتديات مختلفة ومشاركات ناقصة غير مكتملة والمكتمل منها يكون كله كلام ما نعرف مدى مصداقيته خصوصا لما نلاقي ردود على نفس المشاركة تطعن في الدكتور اللي سوا العملية او اللي كاتب المشاركة نفسه يطعن في الدكتور والردود تلاقي اللي معه واللي ضده وهذا الشيئ اللي انا واجهته وسببلي تشتت...
بسبب أسلوب المواضيع عندنا ما عاد عرفت الدكتور الجيد من السئ... عكس لما نكتب نفس العمليات بالانجليزي نلاقي الاف المشاركات بالصور وينقلولك الصورة كاملة كيف كانو وكيف صارو وينزلو تحديث مستمر عن وضعهم... يعني صراحة احنا نفتقر لهذا الوعي للأسف لكن رب ضرة نافعة...
بسبب التشتت اللي جاني قررت اني انزل الموضوع كامل ويكون مدعم بصور قبل العملية واثناء العملية وكمان بعد العملية مباشرة وبعدها بفترة عشان أي احد يبحث عن نفس العمليات يلاقي امامه صورة كاملة للوضع وان شاء الله اني أكون وفقت في هذا الامر
زي ما سبق وذكرت اني بدأت رحلة البحث عن الدكتور المناسب واستقريت على اكثر 3 أسماء ممتازين منهم الدكتور عدنان صباحي (وهاذي غرفة الكشف حقه, موفر كراسي كثيرة عشان لو مراجعينه معهم أهلهم, حبيت الاهتمام بالتفاصيل الصغيرة)
المهم
الان انا في مرحلة اختيار الدكتور المناسب وهذا معناه اني رايحة اقابل الدكاترة عشان أقيمهم بنفسي واخذت موعدي الأول مع واحد من الدكاترة الثلاثة ورحت دفعت كشفية وجلست معه وكان طول الوقت يكلمني عن العملية وكيف تتم ويرسملي على ورقة قدامه شكل المعدة ومكان القص وفين راح يخيط وانا طول الوقت أقوله ادري ادري ادري وفعلا كل اللي كان يتكلم عنه انا اعرفه تمام المعرفة بل شفت العملية كاملة كيف تتم على اليوتيوب من بداية التخدير للنهاية ومرا ما كان هذا هدفي من زيارته...
كنت ابغى اعرف أشياء ثانية زي كيف راح يكون اكلي كيف راح يكون نزول الوزن كيف راح يكون جسمي ورده على جميع اسئلتي انه يختلف من شخص للثاني ماقدر احدد وانه راح يعطوني كتيب فيه جميع الارشادات ويرجع ثاني يكلمني عن العملية وانا غير مهتمة بتفاصيل العملية على الاطلاق لانه هذا شيء بديهي ما اقدر اتدخل فيه, يعني من جد لما اتبنج ويبدأ يشتغل هل بقوم في نص العملية أقوله ستوب مو كذا تتسوا مثلا !!!
المهم اني في نهاية اللقاء سألته عن سعر العملية وبما اني بلوقر طلبت سعر خاص وطلب حساباتي وقال راح يردلي بالنسبة للسعر
خرجت من عنده بدون فائدة تذكر وجه موعدي مع الدكتور الثاني وهذا كشفيته كانت تقريبا دبل سعر الدكاترة الثانيين لكن مو هنا الخلاف
المشكلة انه ما يحترم مواعيد الاخرين, بعد ما ضربت مشوار لين عنده قالو انه اضطر يسافر !!! طيب ليش ما تكلموني؟؟؟  ليش تخلوني ارتبط معه؟؟؟ يعني فرضا لو اني مو من نفس المدينة وجاية مخصوص عشانه ولا أكون منشغلة وفرغت نفسي عشان موعده واخرتها سافر بكل بساطة !!!
المهم عسى انها خيرة لاني ما دفعت الكشفية وبس عرفت سعر العملية عنده انسحبت وما عاد رجعتله
في هذا الوقت كان الدكتور الأول اطلع على حساباتي ورد عليا قال بخصملك 5 الاف ريال من العملية وفنفس الوقت كنت حاجزة مع الدكتور عدنان صباحي ومستنية الموعد عشان اقرر
الان وصل موعدي مع الدكتور عدنان صباحي(هذا هو بالمناسبة وهاذي صور لاشخاص كان عندهم سمنة مفرطة سوالهم عمليات ناجحة وشاركوه صورهم كتذكار)
دحين انا اعرف كل شيء عن العملية وزيارتي للدكتور كانت مجرد انترفيو نقدر نقول...
رحت محتارة ما عندي أي أسئلة...
ابغاه هو يقولي أشياء ما اعرفها ما خطرت على بالي او اعرفها لكن ماعرف كيف اصيغها...
الخلاصة اني كنت ابغى اعرف كل شيء لكن ما ابغى اسأل عن شيء او بالاصح ماعرف ايش اللي ابغى اعرفه, اعذروني اذا لخبطتكم بس حقيقة هاذي كانت مشاعري
عموما جلست مع الدكتور فتح ملفي راجع تاريخي معه وطالعني ينتظر اني أتكلم...
عمت لحضة صمت...
قاطعها الدكتور بالسؤال هاه يا نبيلة خير ؟؟؟ رديت عليه ماعرف انت ايش رايك ؟؟؟ رجع طالع ملفي بتمعن للحضات وقالي نبيلة انتي فكل زيارة وزنك جالس يزيد اكثر... مستوى الدهون في جسمك صار مرا كبير ولازم تسوي العملية... وبدأ يكلمني عن مخاطر السمنة الصحية اللي أساسا انا اعرفها لكن صرت مهتمة اكثر لما بدأ يتكلم جماليا وليس صحيا (معليش بس البنات هذا اكبر همهم, حقيقة للاسف)
المهم انه انتقل من الحديث عن الصحة للحديث عن الشكل الجمالي والرشاقة وبعدها انتقل للمرحلة العمرية وكل هاذي مواضيع لفتت انتباهي جدا وصرت استمع لحديثه باهتمام خصوصا انه هذا الكلام صادر منه هو شخصيا لاني على مدار ثلاث سنوات فكل مرة اروح عنده اسوي عملية يرجعني, صار عندي ثقة كبيرة فيه من اول لما قالي ان بالون المعدة ما راح يفيدني اذا انا ما غيرت أسلوب حياتي حسيت انه همه الأول والأخير مصلحة المريض وفعليا لو انه يبحث عن مصلحته الشخصية كان سوالي العملية واخذ المبلغ وبعدين ما يهمه اذا رجع زاد الوزن او لا لانه سوا اللي عليه...
المهم كونه الان حازم في حديثه معي عن العملية معناه انه الامر جدي ولا مجال للتأجيل
قلتله طيب يا دكتور كيف راح يكون وزني بعد العملية ؟؟؟
سألته وانا متوقعة يقولي يختلف من شخص للثاني زي الدكتور الأول لكن لقيت انه يرد عليا بسؤال !!!
قال انتي كيف حركتك ايش نشاطاتك اليومية قلتله ابد تحركي جدا بسيط في البيت كل شيء تسويه الشغالة ومشاويري كلها بالسيارة ومو دايما اطلع فكان رده انه بعد العملية مباشرة راح ينزل الوزن الأكبر وكلمني عن كل المراحل بدون ما اسأله وانتقل بالحديث للمرحلة السيئة, اللي هي سلبيات العملية لكن كلامه كان يعطي طاقة إيجابية ما تخلي الشخص يشعر بالإحباط
مثلا قال انه بعد العملية راح يصير ترهل بالجسم وخطوط وراح يكون فيه جلد زايد لكن ما جه يخلص من ذكر السلبيات الا وكان بدأ يتكلم عن حلولها وهي اذا الترهل كان بسيط من الممكن الرياضة تساعد على شد الجسم وفي أسوأ الاحتمالات اذا الترهل شديد ممكن عمل عمليات لشد الجسم بكل بساطة لكن يظل العيش بترهل او جلد زايد افضل من العيش بسمنة...
نفس الشيء بالنسبة لتساقط الشعر قال انه بسبب نقص الغذاء الجسم راح يوزع البروتين على أعضائه الأساسية وبما ان الشعر ثانوي بالنسبة للجسم فما راح يوصله بروتين كافي وهذا الشيء راح يسبب تساقطه لكن ممكن تعويض البروتين الغذائي بادوية المفروض انها تقلل من تساقط الشعر وتساعد على نموه وهذا جانب راح نتطرقله بعدين عشان تسلسل الاحداث...
انتهت مقابلتي مع الدكتور وانا أقوله ابغى اقرب موعد اسوي العملية ووقتها حولني على مساعده الدكتور محمد باوزير عشان أوقع على الأوراق اللازمة قبل العملية وعشان يشرحلي ايش المفروض اسوي وفعلا دخلت عنده وطلب مني اروح المستشفى اسوي فحوصات دم وتخطيط قلب واشعة للصدر واقابل دكتور التخدير يشوف الفحوصات ويقرر اذا تناسبني العملية او لا
خرجت من العيادة وخطوتي التالية كانت التوجه للمستشفى اسوي الفحوصات
دخلت المستشفى قلتلهم ابغى اسوي فحوصات عملية التكميم سالوني أي دكتور قلتلهم عدنان صباحي وعلى طول طلبو مني اروح الاستقبال احاسب أولا... رحت وطلعت جميع الفحوصات ب 1000 ريال, دفعتها وطلبو مني اول شيء فحوصات الدم, رحت المختبر سحبو العينات وبعده على طول رحت سويت الاشعة وبس خلصت رحت سوولي تخطيط للقلب وكان الوقت اللي رحت فيه وقت غداء والمستشفى فاضية وهما تعمدو يكون تخطيط القلب اخر خطوة لانه يأخذ وقت وبما اني راح أكون مستنية هناك فالافضل اخلص وتكون الاشعة وفحص الدم طلعوا كمان وفعلا هذا اللي صار
اخذت النتائج وطلعت لدكتور التخدير وكان دكتور مصري طريف في العقد الخامس من عمره 
شاف الفحوصات وسألني اذا ادخن قلتله لا وسالني اذا كنت اعاني من أي امراض قبل او سويت أي عمليات كبيرة واذا كنت اخذ أي ادوية وأخيرا طلب مني افتح فمي عشان يشوف حلقي وشخبط بالقلم على الفحوصات واعطاني هي ارجع لعيادة الدكتور وفعلا رجعت للعيادة واخذت اقرب موعد للعملية وكان بعد أيام قليلة
دحين المفروض كل شيء منتهي باقي بس احول مبلغ العملية واروح على الموعد
نسيت اذكرلكم اني طلبت من الدكتور عدنان صباحي يعطيني خصم خاص وخصملي 10 الاف وهذا كان شيء مفرح بالنسبالي لكن خليكم متابعين لانه هذا الخصم له قصة وشأن راح اذكرها بعدين
المهم اني خرجت من العيادة على البيت قلت ل زوجي ابغى اروح اسوي عمرة وفعلا الحمد لله سويت عمرة ورجعت حولت الفلوس لحساب الدكتور وبدأت اجهز نفسي للعملية
المفروض الدكتور محمد باوزير طلب مني قبل العملية اصوم بالليل من الساعة 10 او 12 اذا ما كنت غلطانة, وقالي العملية الصباح بس انتي لازم تكوني هناك قبلها يعني انام بالمستشفى والصباح عمليتي لكن انا ما رحت بالليل وفضلت اني اجلس مع اولادي للفجر واروح وفعلا هذا اللي سويته وكان قرار في محله لان الدكتور اتاخر شوية فعملياته الثانية ولو اني هناك من الليل كان طفشت خصوصا اني اكره المستشفيات وراح أكون لوحدي لان زوجي ما ينفع يخلي الأولاد لحالهم في البيت وانا ما قلت ل أي احد قريب اني راح اسوي عملية ما حبيت اقلق واشغل بال احد فكان الموضوع سري لين الأمور تتم على خير ان شاء الله
(هاذي صورة غرفتي في المستشفى)

لما دخلت المستشفى جات الممرضة اخذت قياس الضغط واعطتني ملابس العملية لبستها وبعدين ركبولي ابرة المحاليل وجلست استنى يجي دوري...
في هذا الوقت كنت اصور على السناب وأقول لمتابعيني ادعولي واني في المستشفى وكان فيه تفاعل كبير جدا...
كنت اقرا دعوات المتابعين بالشفاء والسلامة وكنت مبسوطة, على اني كنت خايفة شوية من العملية والتخدير لكني بشكل عام كنت  تمام وكنت جدا متحمسة لين جاتني رسالة من شخص واضح جدا انه يحب الدكتور (العكس صحيح طبعا)...
سالني ليش اخترت اسوي العملية عند الدكتور عدنان صباحي قلت لانه دكتور شاطر وقدملي سعر ممتاز واهم شيء اني ارتحتله قال السعر اللي قدمه لكي لانه بيستخدم دباسات ارخص وممكن تسبب تسريب, عاد هنا انا عدلت جلستي وكتبت كيف يعني ايش تقصد واستنيت الرد لكنه اختار تجاهلي وعدم الرد على استفساراتي
بعد فترة من الانتظار وترقب الرد رسلت اخر رسالة وكانت كلمة واحدة وهي الوووووو وما جاني رد فقفلت وحاولت انسى الموضوع لكن هيهاااات ما قدرت
كنت لحالي مع افكاري... لقيت نفسي انتقل من التصوير على السناب للدخول الى صفحات قوقل والبحث عن إجابة, قلبت كذا صفحة ولقيت انه فعلا فيه حاجة زي كذا وانه الدباسات تختلف جودتها بحسب المصدر والشركة المصنعة وهنا بدأ الشيطان يوسوسلي وضاق صدري وبدل ما كنت حاسة انه الوقت يمر ببطئ صرت حاسة انه الوقت جالس يجري وبعد شوية راح يجو يطلعوني لغرفة العمليات والدكتور ممكن يستخدملي دباسات جودتها مو كويسة وما صرت عارفة ايش اسوي !!!
طلع النهار و جه زوجي لقاني متغيرة ومرة متوترة جلس يسألني ايش فيه وانا ماني عارفة ايش أقوله ولا كيف؟؟؟ هو أساسا كان خايف من العملية اكثر مني وما كان يبغاني اسويها قلتله ما فيه شيء وجلس يهديني بدل ما كنت انا اللي اهديه قبل...
مادري كيف مر الوقت بسرعة جو الممرضات قالو الدكتور جاهز نبغى نطلعك غرفة العمليات وقتها جاني شعور بالرعب وقلت بطلع أقوله خلاص بدفع كامل المبلغ ما عاد ابغى الخصم... ومن الطابق اللي انا فيه لغرفة العمليات صار شريط حياتي كامل ينعرض قدامي ووصلت لغرفة العمليات ما شفت الدكتور كان فيه دكتورة مصرية ودكتور التخدير المصري اللي ذكرته قبل ومساعد الدكتور عدنان صباحي...
هنا زاد الرعب الداخلي اللي فيا وصرت أقول مو بس راح يستخدم دباسات سيئة كمان مو هو اللي راح يسوي العملية أساسا وصرت ابككككي وما ابغى احد يقرب مني الا شوية جه الدكتور عدنان لقاني ابكي جلس يطبطب عليا ويقولي لا تقلقي كل شيء راح يكون تمام ان شاء الله وكان جدا لطيف
وقتها مادري ايش جاني انخرست ومرا استحيت ما قدرت افتح معه الموضوع
فكرت اذا قلتله ما ابغى الخصم راح يسالني ليش واذا قلتله السبب وطلع غير صحيح راح يكون شكلي بايخ ونيتي سيئة وراح ينطبق عليه المثل اللي يقول خيرا تفعل شرا تلقى (حرفيا)
المهم قلت احسن شيء اني ما اسوي العملية من أساسه وكنت مرا متوترة...
قام الدكتور عدنان مسك يدي لقاها باردة وكلي ارجف راح لدكتور التخدير قاله اعطيها شيء يهديها لان حالتها جدا سيئة وفعلا جاب ابرة فيها محلول ابيض وانا نقزت أقوله ما ابغى وجات الدكتورة المصرية اللي معهم تحاول ترجعني اتسطح على السرير وقتها كنت بصرخ الحقوووووووني عصااااااااابة لأني ابغى أقوم وهي تبغاني انام
هههههههههههههههههههههههههههههههههههههههههههههههههههههههههههههههههههههه
جالسة الان على جهازي اكتب الموضوع وانا ميتة ضحك من الموقف وأقول الله يسامحك للي كان السبب في فيلم سرقة الأعضاء البشرية اللي عشته...
حقيقة قبل رسايله كنت مرا رايقة وجالسة اتذمر انه الدكتور متأخر ابغاه يخلص بسرعة عشان يجي دوري
(أصلا واضح في صورتي فوق قد ايش كنت مروقة, كنت جالسة افرفر في الغرفة مستنية دوري واوثق صور لرحلتي عشان انزلها لكم اذا قمت بالسلامة ان شاء الله)
كنت جدا هادية وكول وجالسة اسوي بيس وحبتين وهذا وزني اذا كان واضح وكمان هذا كان شعري ودا الشيء لسة وا وصلنا للحديث عنه
نكمل قصتنا وكنا وصلنا ل انه دكتور التخدير يبغى يعطيني ابرة مهدئة وانا ابغى أقوم والدكتورة تحاول تثبتني على السرير اخر شيء الدكتور الطريف قال (اوكي ريحي نفسك خالص يا فندم عشان اشيل البتاعة اللي ف يدك دي) وفعلا بدأ يشيل اللصق اللي ماسك الابرة وانا هديت وحسيت بالطمأنينة وكنت مركزة مع الدكتورة اللي جات تكلمني من الجهة الثانية
(هذا اللي في الصورة هو اللصق اللي كان بيشيله بس الصورة على وقت التركيب مو العكس)
المفروض انه بيشيل الابرة من يدي لكن ما هي الا ثواني واشوفه طلع الابرة اللي كان فيها المحلول الأبيض وهي فاضية وما جيت استوعب انه حقني حتى حسيت زي التنميل فيدي وعلى طول انتقل لكل جسمي ولقيت نفسي مستلقية بهدوء وانتقلت من التوتر والبكاء للاسترخاء والضحك وهاذي مو المرة الأولى اللي يصير معايا دا الشيء بل لي سابق تجربة ف ولادة ابني الثاني حطولي غاز جلست استنشقه وفجاة فرطت ضحك هستيري خلى زوجي ينادي الدكاترة بسرعة يشوفو ايش الوضع وشافوني صارو كلهم يضحكو عليا, وقتها كان زوجي جالس يقولي بس بس بس يعني كفاية ضحك وانا كنت اسمعها بس بس بس وميتة ضحك, أقول مع نفسي ايش به يبسبسلي وصرت أقوله مياااااااااو واضححححححك
عاد المرةهادي ماعرف ليش كنت اضحك بالضبط لانه المرة اللي فاتت زوجي حكالي اللي صار اما المرة هادي كنت لوحدي ما افتكر ايش صار بس اكاد اجزم انه كان فيه احد عند راسي يقولي انتي تتعاطين مخدرات لكن بعد التفكير في الامر اشوف انه مجرد أوهام...
المهم لحد هنا وتوقف عندي الزمن, اللي اتذكره اني فتحت عيوني لقيت نفسي فغرفتي ثاني وزوجي كان يصحيني واتذكر اني بس بدأت افوق قمت اصيح على طول من الألم, وزوجي بيحاول يطبطب عليا وانا كل ما فقت اكثر زاد صياحي اكثر قام زوجي راح للممرضات قالهم اعطوها شيء مهدئ لانها تعبانة مرا وجت الممرضة تقول ما ينفع عشان دوبها نزلت بس لما شافت قد ايش كنت تعيسة واصيح قالت بطلع اكلم الدكتور وفعلا راحتله ورسل معاها ابرة اعطتني هي ورجعت نمت ثاني, كان الوقت نهار ما فقت الا بالليل ووقتها كنت اشعر بالالم لكن مو نفس الألم اللي حسيت فيه بعد ما فقت من العملية كان اخف وجلست أقول ايش سويت فنفسي يا ربي وطول الوقت دا كانو الممرضات يدخلو ويخرجو وكل مرة معاهم ابرة شكل اللي يحقنوني بيها ف فخدي واللي ف يدي مكان ابرة المحلول والي انتبهتله انه الممرضات الفلبينيات يدهم جدا خفيفة عكس وحدة هندية كنت أتألم منها وتجيني ضيقة لما اشوفها دخلت عندي
الألم راح احكي عنه بالتدريج
بعد العملية مباشرة كان الألم شديد واختفى تماما مع ابرة التنويم اللي اعطوني هي
بعد ساعات من العملية قل الألم كثير وصار شبه محتمل مع الابر المسكنة
ثاني يوم الألم الداخلي اختفى تقريبا, كتبت داخلي لأني حاليا ماعرف فين كان مصدر الألم حقيقة ممكن لو كتبت الموضوع وقتها على طول كان عرفت اعبر عنه اكثر لكن الان كل اللي صار بالنسبالي كأنو وهم او كأنو حلم مزعج شفته في احدى الليالي وصحيت منه بخير
المهم اليوم الثاني المفروض يزورني الدكتور وبعدين انزل تحت يسوولي اشعة عشان يكشفوا عن المعدة كويسة ولا فيه تسريب وفعلا نزلت تحت على رجولي بس كنت امشي مقوسة لأني لما كنت أحاول أوقف توجعني شوية الأماكن اللي دخلوا منها المناظير
نزلت ووقفني الدكتور على جهاز الاشعة واعطاني كاسة فيها محلول مائي قال لما اعطيكي إشارة ابلعيه وهذا اللي سويته وياااا قرفاااااه انا احسب انه مويه طلع ماعرف محلول تنظيف ارضيات ولا مادري ايش هو بالضبط لكنه من اقرف ما مر عليا بحياتي بلعته من هنا وما جيت اخلص الاشعة الا وانا قاعدة ارجعه وارجع كمان سائل اصفر مممر ماعرف من فين جه لاني صارلي يومين ما دقت فيها لا اكل ولا شرب !!!
الان حانت اللحظة الحاسمة اللي كنت مستنياها هل فيه تسريب ولا ما فيه والحمد لله طلع ما فيه ورجعت طلعت غرفتي بردو على رجولي رغم انه الدكتور رسل الممرضة تجيبلي كرسي متحرك لما شافني استفرغ ودايخة بس على بال ما رجعت كنت تمالكت نفسي واسترجعت طاقتي وقابلتها فنص الطريق للمصعد قلتلها بكمل على رجولي ابغى اتحرك وطلعت الغرفة ومع الحركة صرت اقدر أوقف عادي بدل ما كنت أقوم من السرير وامشي مقوسة
(هاذي انا بعد ما طلعت من قسم الاشعة جالسة اوثق ثاني لاني كنت ابغى اخرج لكن الممرضات رفضوا وقالو ما تطلعي لين يكتبلك الدكتور على خروج وجلست احوس في الغرفة أحيانا اتفرج واحيانا اقلب في النت)
هذا الجزء الثاني من الحمام الله يكرمكم
المفروض فيه دش لكن ما اتخيل ممكن احد يتحمم بسهولة بعد العملية لاني شخصيا كنت اغسل وجهي واطرافي والباقي بمناديل التنظيف المبللة
الحديدة اللي حطينها هناك المفروض تساعد على الوقوف بعد استخدام الحمام لكني ما احتجتها ابدا بالعكس كانت اعلى من المستوى بالنسبالي والممرضات كم مرة يجو يسألوني اذا ابغى مساعدة ياخذوني الحمام وانا ارفض وقمت رحت بنفسي كذا مرة بعد ساعات فقط من العملية
بشكل عام انا الحمد لله مرا قوية مو دلوعة واتحمل الألم الى حد كبير, لما كنت اقرا عن العملية كنت أقول ماعرف كيف راح اسويها وكنت شايلة هم كبير من حيث الألم وفترة النقاهة لكن طلع كله تضخيم للامور... على الأقل بالنسبالي لأنه ممكن يكون فيه ناس تحملهم للألم ضعيف وفعلا عانو في فترة النقاهة
مثلا في الولادة على قد تطور الطب وإمكانية انهاء الألم بابرة واحدة انا اخترت الولادة بشكل طبيعي وعلى قد ما كان فيه الم وقتها تحملته ونسيته تماما الان كأنه ما صار وكالعادة دايما ادور الشردة من المستشفى وفعليا اطلع بعد ساعات فقط عكس بنات اعرفهم يجلسو بالايام في المستشفى وبدل ما اشوفهم يتحسنو دايما على وضعهم تعبانين ماعرف ليش ؟؟؟
اغلبهم من الفئة اللي يحجزو سويت ويروحو قبل ب أيام... (فعليا)
كأن المستشفى فندق والممرضات روم سيرفس
عموما هاذي الفئة هي اكثر المعرضين للألم اللي ما ينتهي وانا مو منهم (ماعرف أقول للأسف ولا الحمد لله) لووووول
هادي صديقتي اليوتيوبر لينا والبلوقر طيبة جو زاروني في المستشفى وهذا كان اليوم الثالث بعد العملية
نسيت اذكر انه الدكتور عدنان نقلني من غرفة لجناح على حسابه الخاص وعشان كنت جدا مبسوطة انه العملية كانت ناجحة ومافيه لا تسريب ولا أي شيء قررت اني انا وصحباتي نسوي معاه مقابلة على السناب عشان متابعينا يستفيدو منه وكانت هاذي طريقتي في شكره لكنه تأخر وانا ما صدقت جه مساعده الدكتور محمد باوزير وقالي اذا حاسة انك كويسة تقدري تخرجي قمت مباشرة اخذت عفشي اللي كان ملموم أساسا وعلى السيارة ركض ما استنيت
صديقتي البلوقر غفران راحت المستشفى ومعاها ورد وحركات لكن قالولها طلعت, لووووووول مو مشكلة محسوبة الزيارة ونردها في الافراح ان شاء الله
الان خلصت العملية والحمد لله تكللت بالنجاح
كتبلي الدكتور على ادوية اداوم عليها واعطاني كتيب فيه تعليمات الاكل والنشاط ومواعيد المراجعات معه في العيادة
(هاذي صورة الادوية اللي كتبها الدكتور, سويت منها لوحة فنية معبرة,صح)

الابر قال استمر عليها لمدة ثلاث أسابيع يوميا ابرة تحت الجلد ولو اقولكم قد ايش حاولت اتملص من الابر وكلمت مساعد الدكتور مرتين أقوله اكتبلي شيء ثاني بدل الابر او الغيها لكنه في المرتين كان يؤكد عليا انه اسمتر عليهم لين تخلص المدة وفعلا صرت احقن نفسي كل يوم ب ابرة لين خلصت الثلاث أسابيع
للعلم الابر جدا رفيعة كأنها شكة بعوضة وابدا ابدا ما توجع لكن الألم النفسي اكبر من الألم الجسدي
الدواء الثاني هو حبوب لمقاومة عصارة المعدة والمفروض اخذ منه حبة كل 12 ساعة لمدة ثلاث شهور
انا انتظمت عليه فترة بعدين دخل رمضان ورسلي مساعد الدكتور تحديث على طريقة الاكل واخذ الدواء لكني مرا ما مشيت على كلامه وصرت اخذ حبة وحدة فقط لين خلص وقطعته نهائيا ويا ريتني ما وقفته لاني بعد فترة صارت تجيني قرحة في المعدة, بدأ الامر لما كنت اكل شيء فيه شطة (محدثتكم من محبي الاكل المشطشط) كان يجيني الم فنص الصدر بعدين تطول الامر وصار أي نوع اكل يسويلي قرحة بعدين تطور الامر لانه عندي قرحة على طول حتى لو ما اكلت والاغرب كمان اني كنت اشرب موية على أساس يخف الشعور لقيته يزيد وهنا انا من نفسي رجعت اشتريت الدوا وانتضمت عليه والحمممممد لله اختفت القرحة وليومنا هذا ما زلت استخدمه لكن نادر وقت لما تجيني قرحة من شيء اكلته
اخر دوا كان مسكن للالم اللي هو السولفادين
الدوا هذا انطباعي عنه زمان انه فاشل والسبب انه زوجي ضرسه كان يوجعه وكان يأخذ منه على أساس يسكن الألم ولا كان يسوي شيء ومن وقتها كنت اشوفه فاشل
بعد اليوم الثاني من العملية الألم كان شبه معدوم وما احتجت ل أي مسكنات لكن بعد كذا يوم صار يجيني الم شديد جدا جدا في الجانب الايسر من بطني, الم بعيد عن المعدة بس ماعرف ايش هو جلست يومين انتظر انه يروح لحاله لكن كان يزيد لدرجة اني ما كنت اقدر انام على جنبي اليسار ابدااااااا وهنا تواصلت مع مساعد الدكتور قال انه هذا الألم مكان خروج المعدة وقالي خذي المسكن
انا طالعت المسكن واستحقرته وقلت باخذ منه وبكرة اروح العيادة بنفسي لكن المفاجاة كانت انه المسكن طلع جدا ممتاز وخفف الألم كثير وصرت اخذه باستمرار لين اختفى الألم نهائيا
وصلنا الان للسلبيات (تساقط الشعر بعد التكميم)
الدكتور لما اعطاني الادوية اعطاني معهم بودرة بروتين وقال تشتري زيها وتشربيها لكني ما فتحتها ولا لمستها ولا اشتريتها ابدا
كمان الكتيب اللي فيه التعليمات ما مشيت على أي شيء منه للأسف
المفروض اتدرج في الاكل من سوايل خفيفة ل ثقيلة ل مهروس...
انا على طول بدأت اشرب شوربات بس بكميات جدا بسيطة وبعد أسبوع تقريبا اكلت صباع كفتة صغير وبعده صرت أي شيء ياكلو منه في البيت اقضم منه نتفة بس للعلم كنت ارجع كل اللي اكله تقريبا بس ترجيع عادي مو اللي هو اقعد استفرغ واتعب لا الاكل كان يرجع لحاله بكل هدوء وبساطة...
عموما زي ما ذكرت ما مشيت على التعليمات ابدا حتى مواعيد المراجعات ما رحت ولا مراجعة وكان فيه ابرة المفروض اخذها في المستشفى بعد كم شهر من العملية كمان سحبت عليها وما رحت وادوية الشعر اللي مفروض الدكتور يكتبها لي في المراجعة بردو ما رحت ولا اخذتها والنتيجة انه شعري قام يطيح على شكل خصل بكميات مهوووولة خصوصا في الشهور الأولى بعد العملية
صار شعري جدا جدا جدا خفيف وزي ما انتو شايفين في الصورة صرت استخدم امشاط واسعة على أساس اقلل سحب الشعر شوية والان بعد مرور كل الوقت دا على العملية مازال التساقط مستمر لكن بكميات اقل من الأول والمفروض انه راح تتوسع المعدة شوية وكمان الوزن راح يكون ثبت على اقل شيء فبالتالي حاجة جسمي للبروتين راح تقل يعني راح اقدر اكل الكمية اللي يحتاجها جسمي...
ملاحضة: انا مو خبيرة وكل اللي بسويه اني جالسة احكيلكم عن تجربتي الخاصة وابدا ابدا ما انصح أي احد انه يسوي زيي بالعكس اوصي جدا باتباع الارشادات واخذ تعليمات الدكاترة بعين الاعتبار...
هاذي غرفة الفحص الاولي
دخلتها ثلاث مرات على مدار ثلاث سنوات واخر مرة رحتها كنت ابغى بس اخذ صور للمدونة لكن الدكتور خلاني اخذ قياسات جديدة عشان يراجع معايا لاني زي ما ذكرت ما رحت ولا مراجعة بعد العملية
وأكرر انه هذا خطأ ولازم أي احد يسوي العملية يروح مراجعاته دوريا وعشان تحققو اقصى استفادة من العملية لازم تتبعو التعليمات الغذائية والدوائية بحذافيرها وهاذي نصيحة مجرب مو طبيب
هادي غرفة اخصائية التغذية والمفروض من الشهر الأول اصير اراجع معها لكني ما رحت وبالنسبة للاكل عمري ما واجهت مشكلة فيه
الان اقدر اكل كل اللي ابغاه وفعليا باكل كللللل شيء ابغاه بس بكميات قليلة
فيه نصائح كانت في كتيب الارشادات انا اشوف مالها داعي زي مثلا ينصحون انه ما تاكل وتشرب في نفس الوقت وفي الأساس هذا الامر ما يحتاج نصيحة لانه ما تقدرو تاكلو وبعدين تشربو (عن تجربة)
اللي راح يصير انكم راح ترجعو الموية اللي شربتوها ومعها الاكل اللي اكلتوه زائد شعور بالتعب المفاجيء والضيقة فبالتالي راح تتعلمو لوحدكم انكم تاكلو وبعدها بفترة تشربو او العكس يعني تشربو أولا وبعدين تاكلو
بالنسبة لعشاق المطاعم راح يصيرو طفيليين وياكلو لقمة من كل طبق وامورهم تمام...
من جد صرت لما نروح مطعم اغلب الوقت طلبي اخذه سفري وصرت حريصة اني اطلب أشياء تتسخن بعدين على اني تقريبا صرت اكل كل شيء بارد لاني افتح الثلاجة واشوف انه مشوار اسخن واجهز وانا أصلا راح اكل لقمتين فصرت اخذلي ملعقتين عالسريع وانتهى الامر
كمان وقت الاكل اذا كان مرا لذيذ صرت اخذ حصتي اخليها على جنب واصير اكلها على مدار اليوم واذا كان عادي صرت اكل منه وقتها وبعدين اكل أشياء ثانية وهكذا...
عموما مسألة الاكل والشرب تختلف من شخص للثاني, قبل العملية كنت اقرا مواضيع مختلفة وياكثر ما شفت ملاحضات عن الاكل... الي يقول جلست شهر على السوايل واللي يقول ما صرت اقدر اكل شطة واللي يقول تجيني دوخة بعد الاكل واشياء ثانية كثيرة...
انا الحمد لله ما واجهت أي شيء زي كذا اطلاقا لدرجة اني لولا نحفت بسرعة وصرت اشبع من كمية بسيطة كان قلت ما سويت عملية
من جد جسمي وعقلي اتعودو على الكميات القليلة وصار الموضوع بالنسبالي كأني عمري ما كنت اكل كثير
الشيء الوحيد اللي بطلته هو المشروبات الغازية لاني مرة بعد فترة بسيطة من العملية شربت شوية بيبسي قلبت كياني صرت اكح واستفرغ فنفس الوقت وعيوني تدمع وعرقت وحالتي صارت حالة, الحادثة هادي مر عليها فترة طويلة بس للان ما اقدر اشرب بيبسي مع الاكل احيانا لما اكل شئ حادق اخذ رشفة صغيرة وخلاص اكثر من كذا ما اقدر
هو المفروض قريت في كتيب الارشادات اني ما اشرب بيبسي أساسا لكن العبط يجري فدمي, لوووول
بعد العملية بكم شهر حسييت ان اكلي في البيت مو مضبوط والمفروض اكل اشياء صحية فاخذت عرض دايت سنتر بس ما استمريت عليه للاسف
الاكل الموجود كان كثير بالنسبالي وما قد كملته ابدا بس كانت تجربة ممتعة
في الصورة هادي صورت واحد من الصناديق اللي وصلتني عشان تشوفو ايش بيكون فيها بالضبط لان اعرف ناس كثير عندهم فضول عن ايش بتقدم شركات الوجبات الصحية, او على الاقل انا كان عندي فضول...
هما نظامهم بيرسلولكم مينيو فيه وجبات شهر كامل وانتو تختارو منه الاصناف اللي تبغوها, طبعا بيقدمو وجبات اليوم كله فطور غدا وعشا وسناك
شخصيا اشوف الفكرة جدا مناسبة للي يبغو اكل صحي وعندهم ارادة للاستمرار طبعا

الحين في المرحلة هادي انا مداومة في النادي وهادي الاشياء عبارة عن بروتينات ومكملات
صرت اجري واشيل اوزان حديد ثقيلة بعد ما كنت اتعب من خطوتين صرت مرا نشيطة واقدر امشي مسافات طويلة
البروتينات والمكملات مع الرياضة ضبطت جسمي كثير, والدهون اللي كانت فكل مكان اختفت وصارت عندي كتلة عضلية ممتازة
كثير لما انزل صورة عالانستقرام يلاحضو متابعيني الشيء دا خصوصا في الجزء العلوي من جسمي مرا تغير عن اول وصار بيرفكت
هذا شكلي بعد نزول اطنان من الشحوم, هههههههههههههههههه
عاد الصورة هادي قديمة شوية لان اخذتها قبل فترة والموضوع نزلته اليوم وطبعا وزني نزل اكثر بكثير من وقت الصورة
االي بيفكرو انهم يسوو العملية انصحهم فيها وبقققققوة
انا هاذي كانت تجربتي الفعلية وللابد راح اظل اشعر بالامتنان الكبيييييييير جدا لدكتوري الممتاز عدنان صباحي
الدكتور حرفيا وبدون اي مبالغة فنان في شغله
بعد العملية اتوقعت الاقي غرز بس لما شلت الضمادات كان الجلد مكان الثقوب متلصق في بعض بدون ولا خيط واحد ماعرف كيف بس كنه حاط غرا ملصق فيه الجلد
الان العلامات هادي اختفت تمااااااااااااما ولا كأني عمري سويت تكميم وهنا يفرق الركتور اللي يفكر في الشكل الجمالي للمريض في المستقبل من الدكتور اللي هدفه فقط يسوي العملية وما يفكر في اشياء ثانوية زي علامات الثقوب
اتكلم عن تجربة حقيقية لان بعد حوالي سنة من التكميم جاني الم مفاجيء فنص صدري وواصل لظهري الم شدييييد خلى اهلي ينقلوني المستشفى في الحال وانا منسدحة على الكرسي الخلفي للسيارة وماما وزوجي مو عارفين ايش فيا لان دوبي كنت زي الحصان وما قد اشتكيت من اي شيء ابدا
وصلنا المستشفى وهناك اعطوني محلول مسكن وبسرعة سوولي الفحوصات صلع الالم من المرارة ولازم استئصالها لان ملتهبة جدا وفعلا قررنا موعد العملية
الدكتور كشف عليا وهو شايف في الاوراق اني مسوية تكميم فاعجب مرا بموضوع انه اماكن الثقوب اختفت واشاد بالدكتور اللي سوالي التكميم ووعدني انه بعد عملية استئصال المرارة راح يسويلي خياطة تجميلية عشان تكون النتيجة نفس حق التكميم
بس للاسف كله كلام
اول شيء بعد العملية لقيت عندي خيوط زي حق سنارة الصيد وقالي يوم المراجعة انه يبغالها اسبوع وتطيح لحالها وقتها كان موسم حج والله كتبلي اني اروح الحج بعد العملية بأيام... وتعرفو الدنيا حر وعرق وانا بطني كلها ثقوب وخياطات وكنت اتألم منها والخيوط ابدا ما طاحت
انتهي الحج ورجعنا جدة صارت الخيوط تحاول تدخل في الجلد بس مربوطة من برا وصارت مرا توجعني
جيت اشيلها بالمقص بس تفكيري المنطقي قالي لا تتفلسفي وتجيبي العيد فقررت اخذ موعد مع الدكتور نفسه هو يشيلها على انه قال راح تطيح بعد اسبوع ووقتها كنت تقريبا داخلة فشهر وهي زي ما هي بالعكس كنت احيانا احاول امسكها بيدي اسحبها وهي ثابتة ثبات الخرسانة
المهم رحتله قلتله وات ايز ذيس دكتور مو قلت اسبوع وتطيح هذا احنا في شهر والخيط زي ما هو فجلس يسلكلي وقال الحين اشيلها وجاب مقص وقطع الجزء العلوي من الخيط قلتله ليش ما سحبت الخيط اللي جوا قال عادي هذا يذوب مع الوقت ومرا ما اقتعنت بكلامه وفعلا كان احساسي صح لان الان وانا اكتب الموضوع عندي مكان القطع اللي طلع منه المرارة مو بس باين لا وكمان طالع لبرا كأن تحته شيء وهو فعلا تحته الخيط اللي ما سحبه وللان احيانا يوجعني المكان بس عشان ناوية على عملية تجميل قريب ان شاء الله قررت اني وقتها اخلي الدكتور يشوف ايش فيه تحت الجرح ويضبطه من البداية
وهاذي كانت قصتي مع التكميم واكيد راح تشوفوني قريب فعملية جديدة ان الله اراد
لكل اللي راح يقرو الموضوع من الدببة احب اوجهلكم تحية من اختكم الدبة سابقا
ومن كل قلبي اتمنى انه موضوعي هذا يكون مفيد لكم وانه يساعدكم على الاختيار اذا كنتم مترددين
واخيرا اتمنالكم الصحة وانكم توصلو لهدفكم في الرشاقة وان اموركم كلها تتيسر باذن الله
صديقتكم من وراء الشاشة في مكان ما في العالم
نبيلة




No comments:

Post a Comment