ايش السبب اللي ممكن يخلينا نحب الدهون

السلام عليكم ورحمة الله
في عالم الرشاقة الدهون عدونا الاول, حرفيا صرنا نكره الدهون ونحاول نبعد عن اي شيء موجودة فيه
مثال بسيط
كمسلمين كل سنة نشتري ذبيحة في العيد, وطلبنا الاول انه الجزار يتخلص من جميع الدهون
عمرنا ما فكرنا نحتفظ بالشحوم لاننا ببساطة ما نحتاجها او بالأصح ما نعرف كيف او في ايش نستخدمها
موضوع اليوم درس عملي جميل عن كيفية استغلال الدهون بشكل مميز فخليكم معايا...

اول شيء عشان ابدأ التصوير لموضوع اليوم كانت لي زيارة للبلد, اشتريت من هناك الدهن اللي هو اساس التطبيق
قبل كنت في السوبر ماركت, رحت قسم اللحوم قلت للجزار ابغى اشتري شحم قال للاسف احنا نرميه بس تقدري تلقينه في البلد ومن هناك بدأت الرحلة
اشتريت حوالي 5 كيلو دهون ب 20 ريال
من البلد بردو اخذت الماكينة هادي من محل اواني منزلية
هي عبارة عن مكينة بدائية لفرم اللحم زمان وحاليا تستخدم لعمل نوع معين من البسكوت اللذيذ
انا اخذتها عشان افرم فيها الدهن وبعدين بستخدمها للبسكوت
سعرها 30 ريال مع ملحقات متنوعة لتشكيل الحلويات

هذا شكل الدهن بعد ما فرمته, حطيته فقدر وحطيت عليه شوية موية زهر
موية الزهر راح تتبخر كلها اثناء الطبخ بس حطيتها عشان تقلل من ريحة الزفر اللي بتطلع لاني استخدمت كمية كبيرة من الدهن
بعد ما حطيته على نار هادية
فدقايق ذاب الدهن تمااااما وهذي السرعة سببها انه كان مفروم
لو اني اكتفيت بتقطيعه فقط بالسكين كان راح ياخذ وقت اطول بكثيييييير خصوصا ان الكمية كبيرة
هنا بعد ما طفيت عليه النار وصفيته
شوفو كيف طلع منه بقايا لحم رغم اني كنت حريصة جدا في التنظيف
البقايا هاذي تروح مباشرة للزبالة " الله يكرمكم" 

بعد التصفية حطيت عليه اعواد قرفة, مسمار ويانسون, مراااا احب ريحتهم
تقدروا كمان تستخدموا هيل, قهوة, لافندر... او تستخدموا بدالها اي زيوت عطرية عندكم, لكم حرية الاختيار
المهم خليته لين برد وبدأ يتجمد وبعدين صفيته ثاني

هنا بعد ما صفيته في نفس الصفاية اللي فوق رجعت فلترته اكثر
اخذت غترة طويتها على اربعة وصبيت فوقها الخليط بعد ما ذوبته ثاني لانه بدا يتجمد من تحت
الطريقة هاذي تعطيكي سائل صااااافي زي الموية
هنا صبيته في علب وحطيته في الفريزر يتجمد بسرعة عشان اكمل تصوير
صبيت كمان في القوالب الصغيرة عشان اشوف بيذوب فدرجة حرارة الغرفة ولا لا
النتيجة واضحة قوالب متماسكة ما تذوب الا اذا حطيتها على النار
طيب ذحين ذوبنا الدهن وصار صافي وريحته حلوة وبعدين ايش نسوي فيه يا نبيلة؟؟؟
well
نقدر نسوي فيه صابون, نقدر نسوي فيه ملمع, نقدر نسوي فيه عازل
في موضوع اليوم راح اسوي فيه شموع
هنا عندي شموع من باث اند بودي مخلصة
اقدر ارجع استخدمها كلها بس انا اخذت الجزء اللي يثبت خيط الشمع فقط 
بعد ما تشيلو الشمع راح تلاقو الدوائر الحديدية هادي
تقدروا تستخدموا بدالهم اي شيء ثاني المهم انه يثبت الخيط في قاع العلبة
كمان بقايا الشمع اللي في الصحن ممكن استخدمها للتلوين بس اللي هنا الوان خايسة
هنا بعد ما ثبت الخيط وصبيت عليه جزء من الدهن اللي ذوبته
لونه مختلف عشان ذوبت معاه شوية قلم شمع عشان يكون ملون ما ابغى ابيض سادة
زي ما قلت تقدروا تستخدموا بقايا الشمع اللي فوق
هاذي الالوان الشمعية اللي استخدمتها, اصفر, اخضر ووردي
خيط الشمعة لازم يكون 100% قطن مو داخل معاه اي نسيج ثاني
اذا استخدمتو صوف راح ينحرق ما راح يولع
هنا بعد ما اتجمد الدهن وصار شمع
الالوان طلعت اخف مما توقعت, كل ما كان اللون اللي تبغيه اقوى زيدي كمية بقايا الشمع او اجزاء القلم
بسي اتجنن من الخيوط اللي نازلة هادي, كل ما حاولت احركها يطارد يدي, خخخخخخخ
دحين ناخد مقص ونقطع الخيط الطويل ونترك جزء صغير فقط
اذا قصيتوه مرا قصير راح تكون نار الشمعة قليلة واذا طويل راح تكون نار طويلة تتحرك مع الهواء وتسود اطراف القزاز
قصوه حجم وسط وخلاص زي الشموع اللي نشتريها من المحلات
واخيرا هاذي النتيجة النهائية
اتمنى يكون عجبكم موضوع اليوم واهم شيء تكونو استفدتوا منه
اذا عندكم اي سؤال او تعليق اكتبولي تحت في الكومنت
اشوفكم فمواضيع ثانية قريب ان شاء الله
لوف يو, باااااي






3 comments:

  1. الله ما هذا الجمال يا نبيله كل شي في التدوينه جميل من تصوير والفكره والموديل الاكثر من رائع 😂 .
    يعطيكي العافيه يا عسل 💗

    ReplyDelete
  2. الفكره جميله وجديده عليا تماماً بس ماتطلع ريحه زفر ابداً من الشمع؟؟

    ReplyDelete
    Replies
    1. لا أبدا بس حطي معاه اَي زيت عطري عندك يصير تمام

      Delete