سر ابتسامتي البيضاء

السلام عليكم ورحمة الله
في الوقت الحالي صرنا قادرين نخفي كل العيوب اللي فوجهنا بالميك اب, نقدر نغير ملامحنا بالكامل حسب رغبتنا وبدون أي تدخل جراحي، لكن فيه مشكلة وحدة...
مهما كان الوجه جذاب والملامح حلوة اذا الاسنان صفرا تقضي على الجمال والاسوأ من هذا اننا مانقدر نخفي اللون او نغطيه لكن نقدر نتخلص منه تماما فساعة وحدة بالعيادة وهذا اللي انا اسويه دوريا
موضوع اليوم عرض مقدم من عيادات سمايا والدكتور عمرو بخاري اللي كان لطيف بما يكفي انه يخلينا نصور كل شيء عشان نشاركه معاكم فخليكم معانا

اول شيء مو اول مرة اسوي تبييض هاذي خامس مرة ف اللي يقولون التبييض يضعف الاسنان ويخليها حساسة احب أقولكم انهم غلطانين
كيف بدأت اسوي تبييض؟؟
مرة شخص قالي اسنانك حلوة سألت كيف يعني قال بيضة ومرتبة !!!
انا متعودة اسمع كلام زي شكلك حلو ملابسك مرتبة شعرك ناعم بس اول مرة احد يتكلم عن شيء محدد جدا زي الاسنان
من وقتها وانا دايما اركز على لون اسناني وبعد فترة حسيت لونها مصفر وقررت اسوي تبييض وكان عمري ايامها 17 سنة
كنت جدا مرتبكة وقلقانة لاني ماعرف شيء عن التبييض ولا كيف يسووه وزاد قلقي لما عرفت انه يتسوا بدون تخدير, احسبه شيء مؤلم لكنه طلع اجراء جدا بسيط وفمنتهي السهولة

اول شيء يكشف الدكتور على اسنانك يشوف اذا محتاجة تنظيف ولا لا
اذا محتاجة بيسويلك تنظيف قبل التبييض وهذا ما يأخذ وقت
انا كان عندي شوية جير متجمع على الاسنان من جوا بسبب اني مركبة رتينر ثابت وشاله الدكتور بسرعة قبل ما نبدأ التبييض
التنظيف ما يأثر على الريتينر ابدا، الجهاز ينظف بعيد عنه ما يقربه ف اللي مركباه عادي جدا تقدر تسوي أي شيء تبغاه

هنا مع فريق الدعم زينب توثق التفاصيل الصغيرة للمدونة, طيبة ماسكة حسابي على السناب وعلي ورا الكاميرا الرئيسية
نظرات الدكتور فوق احسه يقول ايش السالفة مين ذي!!! خخخخخخخخخ
اني واي
بعد ما خلصنا تنظيف بدأنا في التبييض
بيحط الدكتور حاجة بلاستيك في فمك عشان تظهر كل الاسنان واللثة وعشان ما تقدري تقفلي فمك وقت التبييض
بعدين يحط مادة على اطراف اللثة عشان تحميها من المادة المبيضة
بعدين يوزع جل شفاف على الاسنان وهذا الجل هو المبيض اللي بيبيض بمساعدة ضوء ازرق بيسلطه على الاسنان مباشرة عشان يسرع العملية

دحين نجي للسؤال اللي تكرر كثير على السناب
نبيلة ما تحسي بألم من الجهاز اللي ينحت اسنانك؟؟؟ هو حاطلك مخدر؟؟؟
أولا الجهاز ما كان ينحت الاسنان هو بيلف بسرعة ويكسر الجير المتراكم
طبعا اللي عندهم فوبيا من دكتور الاسنان بس يسمعوه شغل الجهاز ممكن يشردو، هههههههههه
صوته زي صوت الجهاز اللي يحفر عشان الحشو لكنه غير مؤلم اطلاقاااااا
اذا مرررا ما تتحملو شعور أي شيء يلمس اسنانكم الدكتور راح يعطيكم مخدر
ترا بيعطيكم المخدر بس عشان ترتاحو نفسيا وتتخلصو من القلق ولا هو الاجراء غير مؤلم وما يحتاج تخدير
هنا لازم استنى ربع ساعة بعدين يمسح الجل اللي حطه اول ويوزع بداله طبقة جديدة ونكرر العملية لين اربع دورات
واضح من ابتسامة الدكتور انه يبغاكم تشوفو بياض اسنانه الناصع ( قولو ما شاء الله لا تجيبونه الأرض) هههههههه
الدكتور زي ما كتبت فوق اسمه عمرو بخاري استشاري جراحة اللثة وزراعة الاسنان
يعالج معظم المشاكل ومركز على الناحية الجمالية للمريض مو بس الصحية
شفت في حسابه على الانستقرام صور لناس قبل وبعد مرررا فرق خصوصا الابتسامة اللثوية يشيلها نهائيا
للأسف ما قدرت اخذ صور الحالات اللي عالجها من حسابه واحطها هنا عشان الجودة بس تقدرو تدخلو عنده تشوفو بنفسكم
هذا اسم حسابه على الانستقرام/ dr_amrbokhari@
هنا خلصت دورتين وجالسة  اقارن الدرجات على اسناني (ما عليكم من الشباصة اللي صارت اسوارة)
المهم شفت اللون تمام واكتفيت بالنتيجة اللي وصلت لها ومشينا لاننا كنا نصور من بدري حسينا بملل
ثاني يوم طالعت نفسي في المراية ندمت اني مشيت حسيت اللون ممكن يكون ابيض اكثر فكلمت الدكتور حكيته قال نسويلك ثاني اذا تبغي وحددلي موعد كررت التبييض على رواقة
هاذي النتيجة النهائية
يمين لون اسناني قبل ويسار اللون بعد التبييض
قبل ما اطلع قلت للدكتور ابغى اسوي قوالب عشان احافظ على اللون قال بما انك ما تدخني ولا تشربي قهوة ما يحتاج
ماعرف اذا فعلا ما احتاج ولا عشاني اخر وحدة والوقت متأخر يبغى يتخلص مني ويمشي، هههههه
راح اسويهم فجميع الأحوال لاني ابغى أتكلم عنهم فموضوع منفصل فخليكم متابعين
وبس حبيباتي هذا كل شيء بالنسبة لليوم، أتمنى يكون عجبكم البوست واستفدتو منه
اشوفكم فمواضيع ثانية ان شاء الله
------------------------
شكر خااااااااااااااااااااص لكل اللي ساهمو ف اخراج الموضوع
المدونة طيبة أبو بكر مختار/ taibaglamblog@
المصورة زينب الغامدي/ mayaass6@
المساعد علي اباظة
















4 comments: