بطاقات الولاء من سيفورا، البطاقة البيضاء والبطاقة السوداء

السلام عليكم ورحمة الله
ااااااااااااه، سيفورا وما ادراك ما سيفورا
كم من بنت طارت كل فلوسها عندهم وكم من زوج بس يلمح المحل من بعيد ف اي سوق يغير اتجاهه بسرعة
تبغوا الحق؟ ترا ما ينلام، لان الدخول للمحل زي دخولك لصالة قمار دايما نخرج مفلسين
طبعا ما عدى الطبقة البورجوازية اللي واضح اني منها، خخخخخخخخخ
اليوم راح اتكلم عن برنامج تجميع النقاط من سيفورا او زي ما هما مسميينها "بطاقة الولاء"
اول شيء خلوني اعرفكم على البرنامج، ونبدأ من البطاقة البيضاء

اول ما تشترين اي شيء من سيفورا وانتي بتحاسبي تطلبي منهم يعطوكي البطاقة البيضاء
البطاقة البيضاء تيجي مع اي شيء تشترينه مو لازم يكون منتج غالي او مجموعة منتجات
راح تاخذ الموظفة على الكاونتر بياناتك اسمك ورقم جوالك وايميلك وتعطيكي البطاقة بعد ما تسجل عليها نقاط الشيء اللي اشتريتيه مهما كان سعره رخيص او غالي
بعدها بتجيكي رسالة على ايميلك من سيفورا يرحبوا فيكي كعضو جديد في برنامج النقاط وراح يقولولك انك تقدري تروحي اي فرع لهم تستلمي هدية منهم
الهدية تكون عبارة عن شور جل او بودي لوشن انتي تختاري اللي تبغيه
لازم يكون معاكي الايميل اللي رسلولك لا تحذفيه لانه عليه باركود الهدية او اي عرض من عروضهم المستقبلية
هادي هدية البطاقة البيضاء وهي اول هدية اخذتها منهم
كنت ابغى اخذ الشور جل بس للاسف قالو مخلص
دحين انتهينا من البطاقة البيضاء ننتقل للبطاقة السوداء، ايش مميزاتها وكيف احصل عليها
الموضوع دا بالذات كان لازم اكتب عنه بوست كامل لاني من نزلت صورة هدية البطاقة السوداء في الانستقرام وكتبت عن المشاكل اللي واجهتها قامو كل البنات يشتكو من نفس الشئ ويسآلو ايش الحل وكيف اخذتيها وبصراحة تعبت ارد على كل وحدة لحالها وارجع انسئل نفس السؤال ثاني
سو خلوني اشرحلكم اولا كيفية الحصول على البطاقة السوداء
زي ما فهمتكم فوق البطاقة البيضاء تكون مجانية مع اي شيء تشترينه وعليها النقاط حق المنتج اللي اشتريتيه
بعد كذا اي شئ تشترينه منهم تعطينهم البطاقة اللي معاكي يسجلو عليها النقاط لين توصلي ٢٠٠ نقطة
على كل ١٠ ريال راح تصرفيها ف سيفورا راح تحصلي على نقطة وحدة
يعني ببساطة عشان تجمعي ٢٠٠ نقطة وتحصلي على البلاك كارد لازم تشتري منتجات ب ٢٠٠٠ ريال
هادي هدية البطاقة السوداء حقي، فيه خيارين للهدايا تختاري اللي عجبتك
قلنا البطاقة البيضاء تختاري ما بين الشور جل او البودي لوشن هادي كمان تختاري ما بين مجموعتين محددتين من الهدايا
طبعا الهدايا كل فترة تتغير، احيانا تكون اشياء تحمس واحيانا تكون اشياء تافهة
انا الحمد لله لحقت على ارواج ومحددات ميك اب فور ايفر لان الهدايا اللي كانت قبل ما عجبتني ابدا
المهم دحين شرحنا كيف تحصلي على البطاقة السوداء وايش يعطوكي معاها
خلونا ننتقل ل ايش مميزاتها الثانية
هادي الله يسلمكم بعد ما تاخذونها يصيرو يرسلولكم كل سنة ايميل عليه باركود تروحو تستلمو هدية عيد ميلادكم
وكمان كل فترة يرسلولكم عروض حصرية وتخفيضات ما تكون متوفرة للي ما عندهم البلاك كارد
كمان يصيرو يعزموكم على الايفنتات اللي يسوونها فمدينتكم
طبعا ويستمر تجميع النقاط في البطاقة السوداء لانه بس تجمعوا ١٥٠٠ نقطة راح تحصلوا على البطاقة الذهبية
وعشان تجمعوا ١٥٠٠ نقطة لازم تشتروا منهم منتجات ب ١٥ الف ريال
مميزات البطاقة الذهبية هي نفس مميزات البطاقة السوداء بس هداياها تختلف
يعني في عيد ميلادك يعطوكم هدايا احسن من هدايا اصحاب البطاقة السوداء وكمان يعطوكم عروض وخصومات اقوى من عروض البلاك كارد 
هدا لون الروج عليا، يجنن صح
ترا جالسة احط ميك اب عشان اروح العزبة مع papa الباشا
لازم دايما اكون ف مستوى الطبقة الاريستقراطية اللي قلتلكم اني منها
عساكم ما صدقتوا، لووووووووول
المهم نرجع لموضوعنا
اغلب البنات بعد ما يكملو ٢٠٠ نقطة يتفاجأو كل ما راحو يسآلو عن البطاقة يقولولهم لسة ما جات وهذا بالضبط اللي صار معايا
رحت الفرع كذا مرة وعلى طول عندهم اعذار جديدة ومماطلة ويعدوكي انهم يحلو المشكلة ولا بيسوو شئ
لما طفشت من اعذارهم راسلت سيفورا الام، اعطيتهم رقم البطاقة وبياناتي وقلتلهم عن كل اللي صار معايا واني جدا مستاءة من مماطلة الموظفات
ما فيه ٢٤ ساعة الا يردو عليا انه بالنيابة عنهم نحن نعتذر عن هذا التأخير وراح نرسلك البطاقة مع الهدية تقدري تستلميها من فرع التحلية من اسبوعين ل ٣
انا رحت الفرع بعد ٤ اسابيع وفعلا لقيت البطاقة والهدية
وهادي صورة بالروج للذكرى
اوه هذا الايميل اللي راسلتهم عليه عشان يحلو المشكلة
loyalty@sephora.ae
وبس حبيباتي هذا كل شئ بالنسبة لموضوع اليوم
اتمنى اكون افدتكم واشوفكم فمواضيع اخرى ان شاء الله
لووووووف يووووووو







7 comments:

  1. يعطيك العافية عزيزتي ماقصرتي ، تبارك الرحمن الروج طالع بيرفكت عليك ،تتهني يالغلا

    ReplyDelete
  2. يعطيك العافية حبيبتي❤️💕

    ReplyDelete
  3. ماشاء الله الالوان حلوه والهديه مميزه تتهني فيها
    عقبالنا لان للاسف ماعندنا سيفورا طلبت مرتين من سيفورا
    جده ماعليه أخذنا فكره ولو صار واشترينا نطلب البطاقه نستفيد
    لان هوس الميك آب ماله نهاايه ^^Ab_S35

    ReplyDelete
  4. موضوع جميل وتصوير رهييييب استمري ياعسل ❤️❤️❤️❤️

    ReplyDelete
  5. شكررراً شرح كاممل بس ابسألك انا بطلب من موقع سيفورا اون لاين كيف اقدر اخذ البطاقه ؟

    ReplyDelete