زيارتي لمركز العناية بالشعر والبشرة

السلام عليكم ورحمة الله
على كثر ما متابعاتي يسألوني ايش افضل صالون ف جدة اليوم راح اخذكم معايا جولة فواحد من افخم المراكز في المملكة
من فترة جاتني دعوة من مركز العناية بالشعر والبشرة
طبعا المركز غني جدا عن التعريف
نزلت صورة بطاقة الدعوة على الانستقرام والسناب وكان فيه حماس للتقرير
انا نفسي كنت متحمسة ابغى اروح اجرب المركز خصوصا انه عندهم اجهزة جد متطورة لفحص مشاكل البشرة والشعر
بس دوبي كنت مخلصة كورس عناية بالبشرة فاستنيت شهر كامل قبل ما البي الدعوة

زي ما ذكرت بعد شهر كلمت المركز اخذت موعد
جاني تأكيد وتذكير كذا مرة، ونفس يوم الموعد دقو عليا يتاكدو اني رايحة
لما وصلت لقيتهم حاطين اسمي ومنتظرين زيارتي
كانت المشرفة في استقبالي اخذت عبايتي والطرحة حطتهم على علاقة في الدولاب
طبعا اول شخص قيمته كانت المشرفة نفسها لاني احس الموظف لازم يكون واجهة مشرفة للمكان اللي يشتغل فيه
البنت كانت مرا شيك، شعرها مرتب ومكياجها ناعم واخلاقها وترحيبها يخليك تحبي المركز غصب
 اخذتني جولة في المكان عرفتني على  كل الاقسام الموجودة
ترا عندهم فروع متعددة
موعدي كان ففرع شارع الامير سلطان
المركز دورين وفيه اقسام مرا متعددة
غرف للشعر وغرف للبشرة وغرفة خاصة بالكيراتن وثانية للمكياج...، وفيه قسم للبديكير والمناكير والمساج.....
وعندهم جوا غرفة زي البوتيك يبيعو فيها منتجات مختلفة
انا تنحت هناك ما عرفت اركز بالتصوير وما طلعت ب ولا صورة سنعة
"شاااااطرة"
هنا جلسة انتظار اول ما تدخلو جنب الريسيبشن على طول
حاطين ظيافة للناس 
فيه شاي ونسكافة وقهوة عربية
كمان حاطين تمور ومكسرات وتشوكلت
الجلسة مرا مريحة ما تحسي بالوقت لانهم موفرين كل شيء مسلي من تيفي ومجلات ونت
وعادة يجلسو هنا اللي خلصو ومستنيين السواق لان الجلسة جنب الباب
هنا مجلس الدور الاول
جدا فخم ومريح 
هنا يجلسوا الزباين اللي دوبهم وصلو ينتظرو دورهم اذا كان فيه ضغط بالمواعيد وكمان المرافقين يقدرو يجلسو يستنوا هنا
للاسف ما اخذت راحتي في التصوير لانه فيه ناس ولا هو محتاج على الاقل صورة كاملة
المهم الدور هذا مخصص للشعر
صورة من زاوية اخرى
فيه هنا كتالوجات لخدمات المركز وتعريف بالعلاجات المتوفرة......
الكتالوجات فيها عروض مختلفة وخدمات متنوعة
عاد احنا اي مكان نروحه اول شيء نسأل عنه هو العروض، خخخخخخخخخخخخ
هنا زاوية من الغرفة اللي سويت فيها علاجات بشرتي ومساج
جدا جدا مريحة
طبعا المكان كله شموع وميوزيك هااااادية
انا طلبت تشغيل النور عشان اصور
ترا صورت الجهة الثانية للغرفة بس لما نزلت الصور اكتشفت ان المرايا عليها انعكاسي وانا بمنشفة المركز
لووووول
هنا حاطين مشروبات باردة وسخنة ضيافة للزباين
احس ما شاء الله مهتمين ب ادق التفاصيل
يعني اللي بتسوي مساج او علاج للبشرة الا ما تعطش بسبب البخار
انا اول ما خلصت علاجات بشرتي جيت طوالي على الركن دا صبيتلي موية بالليمون مرررا منعشة  
 هادي غرفة الكيراتين
مخصصة فقط للكيراتين وما يسوو فيها اي خدمات ثانية للشعر
مميزة عن باقي الغرف انها اكبر واوسع
 صورة من زاوية اخرى
الغرفة هادي بالذات حطوني فيها وانسوني
التصميم التصميم التصميم
جدا جدا جدا جدا جمييييييييييييييل 

 هذا المكان اللي سويت فيه علاجات الشعر
لاحظو فرش الشعر والكليبسات وكل الادوات الثانية معقمة وكل وحدة مقفلة فكيس لحالها
هادي ضيافتي
ياخي يعرفو كيف يدللو زباينهم
ترا هذا الشيء متوفر للجميع مو لاني راح اكتب تقرير عن المكان وكذا
هذا قسم المناكير
لما خلصت بشرتي والشعر قالتلي نسويلك بس يدي ورجلي تمام الحمد لله ما تحتاج علاج فرفضت
المناكير كمان رفضت اسويه لاني كنت بخرج اتوضى ف راح اشيله فجميع الاحوال
بس ما عندي اي شك ان القسم هذا وخدماته لا يقل فخامة عن باقي الاقسام
هنا الحمام "الله يكرمكم"
عاد اهههههههم شيء عندي في اي مكان اروحه هو الحمام
لازم يكون جدا نظيف ومعقم لانه يعتبر حمام عمومي
اللي متابعيني من زمان عارفين الشيء دا لاني قد كتبت عنه في بوست سابق
للاسف فيه اماكن تعتمد على الناس ينظفو الحمام بنفسهم بس خلينا نكون صريحين
بعض الاشكال مبدأهم في الحياة انا ومن بعدي الطوفان، ما يكلفو على نفسهم عناء تنظيف ما استخدموه
الاماكن الفخمة دايما فيها عاملة تدخل تعقم الحمام بعد كل شخص يستخدمه
شخصيا بس دخلت اول شيء سويته اخذت منديل بليته ورميته على الارض ورشيت شوية موية
خرجت صورت ولما خلصت رجعت للحمام ثاني لقيته نظيييييييييييييييف
المنديل اللي رميته على الارض والموية اللي رشيتها اختفوا
هذا اللي اسميه اهتمام بالزبون وهاذي الاماكن اللي اوصي فيها وانا مطمنة
 واخييييير قبل ما اطلع
المفروض انهم يجمعو كل الستاف اخذلهم صورة جماعية بس كان فيه زباين كثير واغلبهم مشغولات وانا كنت مستعجلة ما قدرت استنى
بس صورت اماني ونورة
بنتين زي السكر، بشوشين وروحهم جدا مرحة، من الناس اللي ترتاحيلهم وتاخذي عليهم بسرعة
اصلا ما يحتاج اقول ابتسامتهم تعبر عن اللي ابغى اوصله لكم
وبس حبيباتي هذا كل شيء بالنسبة لموضوع اليوم
التقرير القادم راح يكون عن صالون ميزون دو جويل ان شاء الله
استنوني
xoxoxoxoxo




1 comment:

  1. الله يعطيك العافية.. مرره حميتيني أروح له..عاد أنا من زمان ودي أزورهم بس هالمرة إن شاء الله لي زيارة قريبة

    ReplyDelete