واخيرا قررت اعترف بمعناتي السرية

السلام عليكم ورحمة الله
موضوع اليوم مختلف جدا عن باقي مواضيعي المعتادة, رغم انه فيه منتجات لكنها من المنتجات اللي كل الناس يتمنوا عمرهم ما يشترونها
هذا الموضوع بالذات يخص الامهات واطفالهم تحديدا لكن اي بنت تقدر تستفيد منه في المستقبل
المفروض اكتبه من سنة او اكثر لكن بصراحة كنت جدا مترددة لانه شيء محرج ومو سهل عليا اعترف فيه كأم
حسيت ممكن يفسر كاهمال او تقصير وهادي كانت نصيحة صديقة مقربة مني سو نسيت الفكرة تماما لين وحدة من متابعاتي كلمتني عن بنتها وكانت نفس موضوعي فقررت اكتبه اخيرا

رغم جمال صورة البرودكتس الا اني اتمنى ابدا ابدا ما تحتاجونها لانها وبكل اسف منتجات للتخلص من القمل
ايوا اللي قريتوه صحيح, المنتجات كلها للتخلص من القمل, سو جماعة ال ييييع وال إإإإإإيو بليز قفلو الصفحة الان لاننا ما نبغى نقرفكم اكيد
باقي الامهات خليكم متابعين راح اكتبلكم عن تجربتي مع الشيء دا وكيف عالجته وايش رأيي في المنتجات
بس قبل ما نبدأ خلوني اعرفكم على بطل قصتنا اليوم
هذا اول العنقود او الزاحف الكبير زي ما صديقاتي الانستقراميات عارفينه
هادئ ومنطوي مقارنة بالزاحف الاصغر منه, مرا طيب وفرندلي حتى لما يكون مشغول بشيء بس نقوله تعال يجي مو زي اخوه ما يعطينا وجه
احتكاكه بالاطفال كان شبه معدوم لين السنة اللي فاتت دخلناه الروضة ومن هناك بدأ كل هذا

ف يوم رجع من الروضة جلست العب معاه الا اشوف اشياء لونها ابيض على شعره, في الاول احسبه بقايا غبار الطباشير او جير فقط
قمت انفض شعره كذا بيدي وبدل ما يختفي الشيء اللي كنت احسبه مجرد غبار صرت اشوفه بوضوح اكثر
 لما دققت فيه تأكدت انه هذا قمل في طور النمو
وقتها من جد حسيت بالذعر, وفجأة صرت حاسة بالحكة فشعري  وف كل جسمي كمان
ادري انه شيء غير منطقي وحتى زوجي صار يقولي انتي مبالغة ترا مو نمل عشان يمشي على جسمك بس والله جاتني حكة غير طبيعية فكل مكان مادري كيف
المهم قررت ان الجميع راح يخضع للعلاج وكل شيء في البيت راح يتغسل بموية مغلية
رغم انه ولدي الاصغر ما لقيت عنده شيء بس قلت اكيد فيه لكن يمكن لسة في البداية ولا هو راسه براس اخوه على طول
اشتريت المنتجين اللي تحت من الصيدلية والخطة كانت ابدأ بالاولاد اول وبعدهم الشغالة وزوجي وانا
المفروض العلاج يكون كورس من 4 ايام لاسبوع لكن اللي صار اني بعد ما رشيت السبراي على كل شعرهم وغطيته بطريقة ما وصلو المنتج لعيونهم
قمت اجري اغسلهم بسرعة وهما يبكوا ومو راضيين يقفلو عيونهم من الشامبوا...الخلاصة الموضوع كان جدا كارثي
عيونهم صارت محمرة خصوصا الكبير عيونه اصلا مرا حساسة ما يتحمل حتى موية المسبح
لكن المنتج كان جدا فعال لاني وانا اغسل شعر الزاحف الكبير طاح منه قمل بدون ما استخدم لا مشط ولا اي شيء
وكمان وانا انشف شعره لقيت وحدة في المنشفة بردو بدون ما استخدم مشط اطلاقا
كرأي في المنتج فقط عجبتني نتيجته جدا لكنه كان مرا خطير على صغاري
التجربة كلها كانت مرا سيئة لهم وليا كمان, اليوم كله صار صياح كل ما بكوا ابكي معاهم والوم نفسي
ما كان عندي اي استعداد اعرضهم لكل هذا ثاني, سو انتقلت للخطة البديلة
قررت احلق شعرهم بنفسي عشان ما ابغى يروحو الحلاق ويلاقي شيء في راسهم بس المكينة هاذي تحلق عالزيرو وانا ابغى الشعر يكون مررررررا قصير لكن مو قرعة, لول
خفت يتعرض للسخرية والتنمر من زمايله في المدرسة, وخفت المدرسات تجيهم ملاحضة من احد الامهات ويعتقدوا انه هو اللي نشر الشيء دا...
عموما ما كنت ابغى اي وحدة تلمس ولدي وتقعد تدور فشعره او تعزله عن اصحابه (هذا شعور ما راح تفهمه غير ام مثلي)
اني واي مشطت شعرهم وفتشته بعناية عشان اتاكد ما بقي فيه اي قمل حي وبعدها قلت لابوهم ياخذهم عند حلاق غير حلاقهم المعتاد
واقنعته يحلق هو كمان
بعد ما رجعوا كانوا بيرفكت. شعرهم مررررررررا قصير وفروة راسهم باينة وقتها بس ارتحت
الوحيد اللي ما كان بيرفكت هو زوجي, لما حلق زيهم صار شكله جدا قبيييييح ويضحك
جلس اسبوع يقولي الله يسامحك الموظفين ما عرفوني,ههههههههههههههه

بعد ما خلصت من هم الاولاد كانت باقية الشغالة وانا
اخذت نفس المنتج اللي استخدمه لاولادي وبخيته على شعرها لين خلص لانو شعرها مرا كثيف ما شاء الله
بعدين غطيته وضبطت المنبه على الوقت المحدد
بعدها اخذت مشط اسنانه صغيرة وجلست امشط شعرها بنفسي وما كان فيها اي شيء
بعد ما غسلت ونشفت جلستها قدامي وقسمت شعرها خصل, اخذت الستريتنر/مكواة الشعر حطيته على اعلى درجة حرارة وفردت كل خصلة لحالها اكثر من مرة
الطريقة هاذي تحرق كل حاجة لاصقة على الشعر تماما
زمان الناس كانو يقدروا يتخلصو من القمل الحي لكنهم ما يقدروا يتخلصو من اللي في طور النمو
دحين مع وجود مكواة الشعر صار العكس, سهل جدا احراق اللي يكون لاصق لكن الخوف من الحي لانه يتكاثر بشكل سريع جدا وقبل ما تقولي عالجت المشكلة تلاقيها ظهرت ثاني
اخيرا جه دوري لكن المنتج اللي اشتريته اول خلص, دقيت على زوجي راح جاب النوع الجديد هذا
لما بخيته على شعري لقيته مختلف جدا عن المنتج الاول
هذا مائي خفيف وتقريبا ماله ريحة عكس اللي فوق محلول زيتي ثقيل وله ريحة واضحة
سويت نفس الخطوات اللي فوق وبردو ما لقيت اي شيء فشعري لما مشطته
طبعا فردته على اعلى درجة حرارة كمان وخليت الشغالة وزوجي وصديقتي يشوفوا اذا فيه شيء ولا لا والحمد لله ما كان فيه شيء
بعد المعاناة المحرجة هاذي صرت على طول اسويلهم تشيك اب واخلي شعرهم دايما اقصر شيء
الكبير صرت اغسل شعره بالشامبو اللي مع المنتجات مرة كل اسبوع ودحين صرت استخدمه للاثنين لانهم في نفس الروضة
رأيي في المنتج دا ماعرف كيف احكم عليه بصراحة لاني ما كان عندي شيء يقضي عليه بس اذا خيروني بين الاثنين راح اختار اللي فوق لاني حسيت تركيبته اقوى وفعلا فعال

وبس حبيباتي هاذي قصة معاناة حبايبي الصغار(الله لا يعودها عليهم يا رب)
حبيت اكتب عنها لما اكتشفت عدد الامهات الكثير اللي يتابعوني
اتمنى تستفيدوا من تجربتي وتتجنبوها
اشوفكم فمواضيع اكثر جمالا ان شاء الله
XOXOXO

8 comments:

  1. بالعكس أبدا ما أحس الموضوع محرج .. فيه توعية للأمهات وحتى البنات
    لأن مو بس الأطفال الي يجيهم ، حتى الكبار
    فحلو الواحد يتوعى وينتبه لنفسه قبل ما يجيه شيء
    وأنا وحدة من الناس الي شفت معاناة اختي في هذا الشيء
    تقريبا سنتين ننظف شعرها ويرجع وننظف ويرجع .. وكله من المدرسة
    والحمدلله الين راح
    ونصيحة لك تكلمي المديرة أو مسؤولة في الروضة عن هذي المشكلة
    عشان ينتبهو للأطفال وفي نفس الوقت ينبهو الأمهات ويوعوهم
    حبيت طرحك للموضوع وإنو محد تكلم عنه ��

    ReplyDelete
  2. بالعكسس الموضوع جمييل وماتوقعت انه يكون عالقمل ابدا انا بنت ومااتقرفت من الموضوع بالعكس لمن جيتي تحكي قصتك اتذكرتي اخواتي ومعاناتهم اول ماادخلو اولادهم الروضة كدا صار معاهم وبنفس الطريقة عالجوها بالحلق والستريت وبمنتجات القمل وعلى سيرة الحكة انا بس قبدات اقرا الموضوع جلست احك شعري وجسمي تلقائيا😁
    المهم يعطيكي العافية عالموضوع دايما مواضيعك بجدد ممميزة 💞👏🏻

    ReplyDelete
  3. أقرأ وفروة راسي تحكني هههههه
    أنا لسى ما صرت أم لكن زمان وأنا صغيرة مريت بالتجربة وكانت أمي الله يجزاها الجنه ويحرم ايدينها عن النار هي اللي نظفتني وما كنت اذكر ايش سوت لي الا انها كانت تمشطه بالمشط القديم الابيض هههه
    فعلا المدرسة هي السبب والوقاية خير من العلاج وجزاك الله خير على طرحك للموضوع
    مافيها شي عيب ولا يستحى منه اذا كنتي بنتشرين الفايدة
    لإن القمل أسرع شي انتشاره وماله علاقة بالنظافة أو الاختمام
    الاهتمام والنظافة تبان بعد الاصابة وتعرفين الأم النظيفة والحريصة من المتبلدة
    أول مره ادخل حسابك بس شدني الموضوع وسردك لزيز هههه يعطيك العافية سو سو 😂❤️🌷

    ReplyDelete
  4. الموضوع مفيد و حالة طبيعية تصير في كل بيت
    حبيت البوست و أستفدت منك و الله لا يعيدها لا عليك ولا علينا <3

    ReplyDelete
  5. بالعكس موضوع مفيد جدا ومهم الله يعطيك العافيه خصوصا اني كام لبنيتن اعاني من هالموضوع لكن اهم شي ان تعالجينه اول بأول حتى تقضين على المسأله نهائيا

    ReplyDelete
  6. بالعكس موضوع جدًا مهم جات فترة وانا صغيرة زي كذا انتقلت لي من البنات بالذات ان شعري كان طويل وكثيف ماشاءلله ف سرت استخدم بخاخ وشامبو لين راحت ، و الحين كثيييير مدارس المفروض والله يفتشون اتذكر بعمري كان يفتشون على شعورنا وحدا وحدا للتاكد ولان القمل مايروح بشكل سريع بالذات اذا بدات تفرخ بالشعر تسير الحالة اسوأ ، ف افضل كل اسبوعين او نهاية اسبوعين تشيكو على بناتكم ، شكرا اخيرًا احد طرح هذا الموضوع❤️

    ReplyDelete
  7. بالعكس الموضوع مفيييد وكثير اعاني من اخواني اذا انعدوا من المدرسه

    ReplyDelete
  8. This comment has been removed by the author.

    ReplyDelete