مشتريات ديكورية من روائع المكتبات، برافو، ايكيا والدانوب

السلام عليكم ورحمة الله
موضوع اليوم كان المفروض عن مشترياتي من روائع المكتبات لكني اجلته كثير لعدة اسباب بس سبحان الله بدل ما اتكلم عن شيء واحد صرت راح اتكلم عن عدة اشياء مختلفة
عموما حبيت اشارككم اماكن انا احبها وتعجبني اشيائهم وازورها بشكل متكرر
الاغراض اشتريتها في اوقات مختلفة ف ماني متاكدة من كل الاسعار، راح اكتب اللي فكراه والباقي ممكن يفرق شيء بسيط
خلونا نبدأ اول شيء من روائع المكتبات بما انه اغلب الاشياء منه
اول حاجة صحن مرررررا كيوت ب 17 ريال
الرسوم اللي عليه تمثل كل شيء احبه
ابريق للشاي ب 68 
تحت احط شمعة عشان يحتفظ بالحرارة وجوا فيه مصفاه، لووووووف
فنجانين للشاي ب 60 
الاثنين جو فعلبة مع بعض، بردو فيهم مصفاة جوا
حامل الكاب كيك ب 138
لما رحت كنت ناوية على ابو ثلاث طوابق بس لما شفت هدا عجبني اكثر 
صينية تقديم ب 39
شكلها انيق وحجمها وسط مو كبيرة مرا
غطاء للابريق ب 43
فيه بألوان ورسمات كثيرة بس انا طحت عند هدا، ما قدرت اقاوم
صينيتين الوحدة ب 13 ريال
حجمها مرررررا صغيرون، يادوب تشيل فنجان وملعقة
سلة حبيتها للفطور احط فيها خبز او كرواسون ..... ب 25
الغطا حقها ينشال عشان يتغسل لا توسخ
سلة كبيرة كمان مرا حبيتها ب 69
بشيل فيها الاغراض اللي احتاجها لما نخرج نشوي برا، غطاها بردو نشيله لو بغينا نغسله
اخر شيء اخذت مروحة ب 45
مراية للشنطة ب 23
شنطة صغيرة ممكن تستخدم للميك اب او مقلمة للاقلام واشياء الدراسة، ماني فاكرة سعرها لاني اخذتها من زمااان
ننتقل لايكيا
اخر زيارة رحت من فترة اشتري ستاير وألحفة بس لما شفت الشموع هادي عيوني صارت قلوووووب
هي عبارة عن كاسة جواتها شمع، اللي حمسني انو حجمها يناسب الشموع الوسط يعني بس تخلص اللي فيها اصلا راح اغسلها واحط فيها شموع ثانية
سعر الوحدة اعتقد 7 او 9 ريال 
كمان من ايكيا اخذت وسادتين، البينك فيه منها كوليكشن كامل وسايد كبيرة صغيرة مستطيلة ولحاف وكل شيء
الوسادة الصغيرة لقيتها جنب الكاشير ما اعرف سعرها واللي فوق بردو ماني فاكرة بالظبط بس امكن في حدود 30 
ننتقل لبرافو
 اخذت كوب كبير ب 13 ريال
غطاه سيليكون يثبت بقوة مو قزاز،  وفيه فتحة صغيرة للشرب
شمعدان تصميمه عربي ب 30 ريال
فيه منه كذا لون، كنت باخذ الاخضر اخر حبة بس بابه كان خربان
سلة زبالة الله يكرمكم، ماني فاكرة سعرها بالضبط بس ما تتعدى 50 ريال
بحطها تحت التسريحة للقطن الوسخ والمناديل المعقمة وكل بلاوي الميك اب
وسادة رقبة للسفر ب 17 ريال، تفك ازمات بصراحة
تبسي كبير مع الستاند صارلي فترة ادورها ب 168 اعتقد
هنا شكلها بالستاند، ترا كبير حجمها بس مو باين في الصورة

من الدانوب
 اخذت قدرين صغار للفوندو، كل واحد لحاله مو مع بعض
الاثنين كان سعرهم بحدود 60 ريال
اخذت الاثنين عشان الوانهم تكمل بعض، راح استخدم واحد للشوكولاتة البيضا والثاني عادي

اخيرا اخذت مكينة القهوة من دولسي قوستو ب 749
قد نزلت فيديو في الانستقرام والسناب شات نفس اليوم اللي كنت في الدانوب واشتريتها
حسابي في الاثنين dazzle_chic1
اني واي، عجبني الشكل دا اكثر من الاكبر منها رغم انو الفرق بينهم 100 ريال فقط
هادي مناسبة لركني وشكلها احلى

هذا حجمها مع الكوب اللي فوق، ادووووووريبل
ممكن انزل عنها تدوينة كاملة بعد ما اجربها كم شهر عشان اعرف احكم عليها صح
________________________________________________________
وبس هادي كل الاشياء اللي حبيتها وحبيت اشارككم فيها
اشوفكم في موضوع ثاني قريب ان شاء الله
لوف يو، باي

4 comments:

  1. الموضوع كله بينك × بينك ...❤❤
    مشتريااتك مررا جميله تتهني فيها =)❤❤

    ReplyDelete
  2. This comment has been removed by the author.

    ReplyDelete
  3. love your stuff super cute.
    thanks for sharing.

    ReplyDelete
  4. كميه كياته ف دا البوست 🗿💀 اي فيل سيك
    ههه مرا مو جو الحاجات القيرلي ب زيادة < ح أنهبد
    من زمان نفسي أزور روائع المكتبات
    عندي نفس الشمعدان اذا م خاب ظني أخدتو من بنتا ب ٧ ريال او ٥

    تتهني ب أغراضك باين ذوقك فيهم

    ReplyDelete