الطريقة الصحيحة لاستخراج زيت جوز الهند

السلام عليكم ورحمة الله
كلنا نعترف بفوائد الزيوت الطبيعية سواء استخدمناها او لا كلنا نتفق على انها مفيدة وهادي حقيقة
ممكن جيلنا الحالي صرنا نميل للاشياء الصناعية اكثر بحكم التسويق المتقن والاعلانات المكلفة لكن حتى اغلى المنتجات مازال مكونها الاساسي زيوت طبيعية وهذا دليل واضح على فوائدها
انا شخصيا احب المنتجات الطبيعية واثق فيها، الزيوت بمختلف انواعها والخلطات كلهم اشياء اداوم على استخدامها ونتايجها معايا ممتازة
بوست اليوم راح يكون عن زيت جوز الهند، طبعا ما راح اتكلم عن فوايده واستعمالاته لانو قوقل مليان، بس راح اوريكم كيف تقدرو تسوونه في البيت بخطوات بسيطة وسهلة

يلا نبدا
النقاط الثلاثة اللي موجودين فوق جوز الهند اهداف سهلة جدا للخرم، سو اول خطوة ناخذ مفك نظيف ونخرم فيه 
ثاني شيء نكون مجهزين كاستين عشان نجمع فيهم موية جوز الهند
نصب في الكاسة الصغيرة اول بعدين نفتح الحبة اذا تاكدنا انها مو خربانة ننقل الموية للكاسة الكبيرة
لازم نسوي الطريقة هادي لاننا ما نبغى نجمع الموية كلها مع بعض وبعدين نكتشف انه فيه كم حبة خربانة، داااااخ
بعد ما نشيل منه القشر نقطعه قطع صغيرة عشان ينطحن بسهولة وما يعدملنا الخلاط
نحط عليه شوية موية دافية ونخلطه لين يصير سائل كريمي سلس 
بعدين ناخذ قدر او سطل او طشت... المهم اي شيء يكون نظيف
نحط فوقه خرقة نظيفة ونصب الخليط، انا ما لقيت خرقة استخدمت تيشيرت، خخخخخخ
دحين نعصر الخليط بقوة عشان تنزل كل الموية اللي فيه
تصدقوا جالسة اصور بيد واشتغل باليد الثانية، وفوق كل هذا وقت التصوير مرا محدود عشان لازم انتقل من خطوة للثانية بسرعة ولا ما راح يزبط
اوووف، من جد تعب بس كنت مصرة ما اسوي سكيب لاي خطوة 
المهم بعد العصر صار مثل ما تشوفون
على اليمين السائل اللي بيطلع منه الزيت، وعلى اليسار بواقي جوز الهند وهي معصورة
دحين نصب السائل في قارورة شفافة
لازم تكون شفافة عشان نقدر نشوف التغيرات ونعرف انو الزيت صار جاهز
هنا بعد ما انفصل الزيت عن الموية والبواقي الثانية
الزيت هو اللي في الوسط، لونه كذا عشان الاظاءة والخلفية لكن على الواقع انقى
دحين نقص القارورة من فوق عشان نشيل الشئ الابيض دا بالملعقة ونشفط الزيت بشفاط المرق
بعدين نصفيه بنفس طريقة الخرقة اللي فوق لكن بدون ضغط او عصر، بس نتركته فترة ينزل لحاله
لما نلاقي الزيت صار نقي وخالي من اي شوائب نحطه في الثلاجة ونستخدمه وقت الحاجة
انا حطيته في الفريزر عشان يتجمد بسرعة واصوره
وهذا زيت جوز الهند طبيعي ١٠٠ ٪ صار جاهز
ريحته مرا مرا مرا حلوة وطعمه كمان
هادي صور من بوست فيه طريقتي المفضلة في استخدامه
اقروه هنا
ـــــــــــــــــــــــــــــــــــــــــــــــــــــــــــــــــــــــــــــــــ
اشوفكم في مواضيع قريبة ان شاء الله
باااااااااي

8 comments:

  1. ماشاءالله عليكك مواضيعك دايما جديددة ومتميزة احاول اجربها باقرب وقتت❤️❤️

    ReplyDelete
  2. تدوينه جميله ..كنت ناويه اطلب الوازيت الاورغانيك من امازون بس شكلي راح ابطل و اعمله في البيت :) مشكوره يا عسل ❤❤

    ReplyDelete
  3. كم حبة لازم عشان تطلع معايا كمية قد الي عندك؟

    ReplyDelete
  4. رووعة الطريقة حمستنينى اسويها بإذن الله
    مشكورة على تعبك و مجهودك

    ReplyDelete
  5. اتحمست للطريقة مرا أباً أسويها ان شاء الله بس م فهمت كيف اشفطو ب شفاط المرق (ايش هوا اصلاً شفاط المرق😂🙈)

    يسعدك ابله ع البوست الجميل اليي زيك 🌸❤️

    ReplyDelete
  6. مشاء الله عليك
    صراحه حمستيني اجرب خليتي طريقته سهله
    بس حتى انا ما عرفت ايش هوا شفاط المرق ياليت تورينا صوره
    ويعطيك العافيه على البوست

    ReplyDelete
    Replies
    1. شكرًا حبيباتي
      شفاط المرق هو حاجة تستخدم لشفط المرق عشان نرجع نصبه فوق الدجاج
      اذا ما عرفتوه عادي تقدروا تستخدمو حقنة كبيرة تلقونها في السوبر ماركت وتشفطوا فيها الزيت

      Delete
  7. مرحبا حبيبتي بسالك انا بسويه بس كم يأخذ وقت على ماينفصل الزيت ووين أحطه بالضبط برا ا

    ReplyDelete