افضل مزيل مكياج واسرع طريقة لتنظيف الوجه

السلام عليكم ورحمة الله
قبل فترة حضرت زواج صديقتي, ورجعت البيت مرا تعبانة على قد ما فريت من مكان لمكان
خرجت من القاعة للسيارة شايلة الكعب في يدي, وطول الطريق بس اتمنى اغمض عيوني وافتحها الاقيني في سريري نايمة وكل شيء تمام...
وصلت البيت جلست قدام المراية انظف وجهي وابغى اختصر كل شيء عشان اخلص وانام, وقتها قررت اكتب تدوينة عن طريقتي المختصرة في تنظيف الوجه امكن تستفيدون منها
SO KEEP READING

قبل ما ابدأ ابغى اتكلم عن اسئلة على طول اسمعها زي
ايش افضل مزيل مكياج؟؟؟ هل المزيل هدا قد المدح؟؟؟ انا مكياجي خفيف وبردو اتعب وانا اشيله!!!
اوكي لازم تفهموا انه مافيه شيء اسمه افضل لكل الناس، دائما فيه اختلاف، مو ضروري الي يناسبني يناسب غيري والعكس صحيح
نوع بشرتك، ميزانيتك وذوقك الشخصي... هادي الاشياء هي اللي تحدد ايش الافضل لكي
بالنسبالي بايوديرما كان وما زال المفضل عندي بس لوريال كمان حلو وينظف كويس والنتيجة في الاخير متشابهة بما اني اغسل وجهي بعد ما اشيل الميك اب
للاستخدام اليومي صرت اميل ل لوريال اكثر لانه ببساطة بايوديرما الحجم الكبير سعره مية وشوية ولوريال حاجة وعشرين يعني قارورة وحدة فقط من بايوديرما تساوي خمسة من لوريال, الفرق واضح
لكن راح يبقى بايوديرما دائما موجود على تسريحتي وهو الوحيد اللي استخدمه لمن اكون تعبانة وما عندي طاقة اغسل وجهي
كمان القطن المفضل عندي من ذا بودي شوب
100% عضوي, ملمسه ناعم ورطب لكنه مرا قوي ومتماسك
  NOW
اول شيء، اشيل العدسات احطها فعلبتها واشيل الرموش احط عليهم شوية كريم مرطب عشان ما يكونو ناشفين ثاني يوم لمن انظفهم
اخذ القطن اكب عليه مزيل الميك اب من بايوديرما وابدأ امسح وجهي
ما تبخلوا في استخدام القطن او المحلول, غلط تستخدموا نفس القطن وهو مليان ميك اب، بس تلاقونه اتوسخ خذوا قطعة ثانية، اذا ما سويتوا كذا كل اللي شلتوه راح يرجع للوجه ثاني، يصير كنكم جالسين تدهنوا وجهكم بالاوساخ
عن نفسي اكرر العملية لين الاقي اخر قطن نظيف مافيه اي شيء وقتها اكون متأكدة اني شلت كل الميك اب اللي على وجهي  
بعد ما انظف كل الميك اب اخذ بخاخ المياه الحرارية من افين وابخه بكثرة على كل الوجه والرقبة، اتركه ثواني وبعدين اخذ قطن وامسحه وهذا الشيء ينظف الوجه من مزيل الميك اب نفسه
دحين ممكن اتوقف هنا لو ابغى بس انا متعودة ارطب وجهي قبل النوم
في العادي استخدم كريم الترطيب الليلي بس في الحالات المختصرة استخدم زيت اللوز لانه خفيف والبشرة تتشربه بسرعة خصوصا ان المسام ممكن تكون فيها بواقي ميك اب جوا فما اثقل على بشرتي بالكريم 
اخذ بس ضغطة صغيرة من الزيت وادلك وجهي ورقبتي بسرعة واخذ اخر قطن امسح الزايد عشان ما تتزيت وسادتي لما انام
 اخر شيء استخدم قطرة العين المعقمة من تيرز ناتورال فري
العين زي الوجه محتاجة ترطيب وتعقيم من بعد العدسات وانواع الاكحال وحتى اللوس باودر اللي تدخل وقت تثبيت الكونسيلر بدون ما نحس
المميز في النوع دا انه استخدام واحد  لكل امبولة، زمان كنت اشتري القطرة العادية وارميها بعدين لان صلاحيتها تنتهي بعد 30 يوم من تاريخ الفتح بس هادي فكرتها ذكية وعملية ومررررررا تريحلي عيني
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وبس هذا هو روتيني المختصر في تنظيف الوجه، سريع وفعال ما ياخذ مني وقت، وكل شيء احتاجه موجود قدامي على التسريحة
اتمنى يعجبكم الموضوع، اذا عندكم سؤال اكتبولي هو تحت
XOXOX, STAY CLEAN



4 comments:

  1. مرا استفدت صراحة
    يعطيكي ألف عافية ياعسل

    ReplyDelete
  2. روتين رائع صراحة بس توقعتك تغسلين وجهك بعد مزيل الميك اب مشكورة على المجهود

    ReplyDelete
  3. اكيد اغسله طبعا، هاذي الطريقة مختصرة، أسويها لا رجعت من عرس او مناسبة، أكون مرا هلكانة ابغى بس انام عرفتي

    ReplyDelete
  4. بالنسبه ليا المناديل اسرع لما اكون تعبانه وبعدين اغسل وجهي بغسول
    بس طريقتك حلوه كمان البخاخ اول مره اشوف احد يستخدمه زيك بس برضو فكره
    لوريال ان شاء الله راح اجربه
    ويعطيك العافيه يا رب

    ReplyDelete