منتجات لاش lush ورأيي فيهم

السلام عليكم بنات
واخيرا بكتب ريفيو عن مشترياتي من لاش, صارلها اكثر من شهرين تحت الاختبار
طبعا لما نتكلم عن منتجات لاش lush اول شيء يخطر على البال هو شامبو big باملاح البحر لانه الاكثر مبيعا في كل الدول

 
الشامبو عبارة عن جل مليان حبوب كبيرة نسبيا
ريحته حلوة ومميزة ممتاز للشعر الدهني, ضروري استخدام البلسم بعده لانه ينشف الشعر
استخدامه بيكون بطريقة لطيفة ما ينفع نحطه على الشعر وندلك فيه الفروة لان الحبوب كبيرة وحادة ممكن تجرح فروة الرأس بسهولة
هذا حجم الحبوب حق الشامبو تقريبا مقارنة مع ملح غسالة الصحون نفس الملمس والحدة والخشونة
بعده العلبة الكيوت هادي, عبارة عن علبة لحفظ الشامبو الصلب او الصابون الصلب اللي على شكل اقراص
العلبة تنباع بشكل منفصل وبأشكال متعددة
من جوا فيها شامبو صلب بالاعشاب, ريحتة مررررا حلوة مقارنة بمنتجاتهم الثانية
الصابون الجديد ما يدخل في العلبة لان حجمه اكبر شوية اذا دخلتوه بالقوة ما راح تقدرو تطلعوه
 بعد الاستخدام حجم القرص راح يقل وقتها تقدرو تحطوه في العلبة بسهولة
استخدامه بيكون نفس الصابون العادي بس انو للشعر
ينظف الشعر كويس ويخلي ريحته حلوة لفترة طويلة, عيبه الوحيد انه الاعشاب اللي فيه تلصق في الشعر مهما يتشطف, دائما الاقي بواقي لاصقة في شعري لما اسرحه رغم اني بشطفه مرررررا كثير
اللي شعرها خشن وكثيف الله يعينها
شامبو اي لوف جوسي
على كلام البنت في المحل انه يشيل الزيوت والدهون وانا بسوي حمامات زيت كثيرة ومحتاجة شيء يشيل الدهون بسرعة وفعالية شميت ريحته في المحل ما عجبتني بس ما اهتميت بما انه ايجابياته اكثر من السلبيات
تعرفو لما تشمو شيء ما تحبوه كيف تنرسم تعابير قرف على الوجه بشكل لا ارادي
هذا اللي بيصير معايا كل مرة استخدم الشامبو دا
كمان بينشف الشعر بشكل مبالغ فيه, اللي شعرها جاف او عادي ما يناسبها وحتى اللي فروتها بس دهنية وباقي الشعر عادي ما راح يناسبها
ما راح ارجع اشتريه
المفضل عندي بلسم الشعر امريكان كريم
ريحته فانيليا على حاجة سويت كذا ما اعرف اوصفه المهم انه روعة
ترطيبه حلو, لكن قوامه خفيف نفس قوام الشامبو, لازم كمية كبيرة منه خصوصا اللي شعرها طويل زيي راح يخلص بسرعة وهذا شيء سلبي لان لاش اسعارها تعتبر غالية 
 
روز جام شور جل
 ما فيه كلام كثير اقوله عنه لانه مجرد غسول استحمام احطه واشطفه في دقيقتين ما يبغاله وصف
بلسم الجسم روز اركان
ممتااااااز
هو عبارة عن بلسم نحطه واحنا في الشور ونشطفه على طول بيرطب الجسم بطريقة مرة حلوة ويخلي البشرة ناعمة وطرية كدا
لوف لوف لوف
شكله من جوا
فوق كريم مرطب للبشرة الدهنية
تحت كريم للحلاقة
كريم الحلاقة من جد ماله داعي, لو استخدم البلسم اللي فوق او اي بلسم ثاني بيكون نفس الفكرة
كمان ما ينفع يكون بديل لجل الحلاقة او حتى الصابون لانه ثقيل كل ما يمر عليه الموس شفراته تتملي بلسم مو زي الصابون او الجل ينزل من الاطراف

الاثنين ريحتهم مقرفة
انفي حساس جدا للروائح وتفرق معايا ريحة المنتجات في عملية الشراء, محل لاش من برة ريحته حلوة لكن لما تدخلو وتبدأو تشمو كل منتج لحاله تكتشفو انه اغلب المنتجات ريحتها مو تمام
 البنت المسؤولة في المحل كل ما طلعت شيء توريني هو اقولها لا ريحته مو حلوة اخر شيء قالت انه منتجاتنا طبيعية عشان كدا ريحتها غير مقبولة الى حد ما لانه ما فيها عطور ومواد كيميائية
كلام معقول, اقتنعت
ثاني سطر مكتوب انه الكريم ممتاز للبشرة الدهنية ويستخدم قبل الميك اب ....
استخدمته تحت الفاونيشن اعطاني نظارة للبشرة بس ما قلل ظهور الدهون, حاليا صرت استخدمه كمرطب بعد الشور بدون ميك اب
تونر مننننعش, ريحته فريش ويعطي البشرة شعور بالبرودة والهدوء
تشو تشو اقراص بديلة لمعجون الاسنان
بنات لازم تاخذو عينة قرص او قرصين من المحل تجربوهم قبل ما تشتروه
لا تتوهقون مثلي
 
مرسوم على العلبة من ورا انه نحط القرص فوق فرشة او بيدنا ونفرك بيه الاسنان
طبعا على هذا الوصف اي وحدة راح تتخيل انه لما نبلل القرص بالموية راح يصير رطب ونقدر نحطه على فرشة الاسنان
رايت ؟؟؟
هذا اللي انا اتخيلته, بس لما حاولت افركه على اسناني
اوووووتش, ايش هدا؟؟؟
 لو اسناني من حديد كان اتجرحت من الشيء الحجري دا, عملية شراء غير موفقة للاسف
اخر شيء فاونديشن ومقشر الشفايف
الفاونديشن لسة ما جربته كثير عشان احكم عليه استخدمته مرة وحدة في البيت راح اتكلم عنه بعدين لما استخدمه اكثر
مقشر الشفايف خسارة فلوس عالفاضي, اشتريت اثنين اللي لونه بينك وهذا
الاثنين كانو مركونين صديقتي قالت ابغى اجربه قلتلها خديه اصلا ما استخدمهم اخدت البينك وخليت هدا عشان اسوي فيه ريفيو
اول استخدام كان وقت الشور
حاولت اقشر فيه شفايفي ذاب على طول قلت يمكن انه شفايفي مبلولة ! نشفت وحاولت ثاني بردو نفس الشيء ؟ رجعت قلت يمكن عشان الشور سخن وبيدوب بالحرارة
ثاني يوم الصباح قمت اغسل وجهي لقيته على المغسلة اخذته فركته شوية على شفايفي الا الاقيه داااب واختفى وشفايفي زي ما هي
ااااااع ويست اوف موني
 زيه زي السكر بالضبط ما في فرق الا في السعر 
  خلاص هذا كل شيء حاليا
اتمنى تكونو استفدتو
باااااي

2 comments:

  1. وايد احب شامبو BIG و دايماً اشتريه منهم ، الشامبوهات و اللوشنات اغلبها ماحب ريحتها مع ان المحل بكبره ريحته حلوة ! ههههههه

    ReplyDelete
  2. دا المحل ريحتو تجيب الصمرقع

    جربت من اللي ذكرتيهم بلسم الشعر ع اني م أطيق الروائح السويت خصوصي الفانيليا بس دا يجنن منجد و ع قولك سعرو غالي للاستهلاك الدائم
    و دحين اخدت منهم كريم الليمون تحت التجربة لسى

    يديك العافية ع الروقان دا

    ReplyDelete