مشتريات ندمت اني اشتريتها

السلام عليكم ورحمة الله 
اليوم راح اتكلم عن الاشياء اللي اشتريتها وما ناسبتني وللاسف مصيرها سلة المهملات



التدوينة المفروض اتكلم فيها عن كل الاشياء اللي ما ناسبتني, بس قررت اقسم الموضوع لجزئين عشان لا يكون طويل وممل هذا راح اتكلم فيه عن الميك اب والجزء الثاني راح اتكلم فيه عن العناية 
نبدأ بكونسيلر وبيبي كريم من غارنييه 
الكونسيلر عبارة عن موية لونها اصفر ما عنده قوام, اذا مسكته بالمقلوب لفترة قصيرة يبدأ يقطر, اول استخدام حطيت منه ما سوا شيء عدت عليه ثلاث مرات ولا غطى اي شيء بس انو الزراق اللي تحت عيوني صار رمادي تقريبا يعني شئ بشع
البيبي كريم اللي خلاني اشتريه هو كثر الاعلانات "بيبي بيبي بيبي, حرفين راح يغيرو حياتك" كنت كل شوية اشوف الاعلان دا ويوم نزلت السوق لقيته قدامي قلت خليني اجربه يمكن يغير حياتي لووووووول 
اخدت الدرجتين على اساس ادمجهم مع بعض لان الفاتح مرا اصفر والمتوسط مرا بني بالنسبة للوني
اااااع الريحة... ما حبيت ريحته مرا قوية وثابتة وكمان في الوجه عند الانف, ثاني شيء البشرة ما تتشربه بيسوي طبقة على الوجه وانا اكره احس انه وجهي دبق ما اقدر المسه كنى حاطة ماسك 
صورة للدرجات والقوام
ثاني شيء موس فاونديشن من ريفلون وفاونديشن من ذا بودي شوب
ريفلون فاشل ملياااااان قلاتر, يوم استخدمته كني حطيت على وجهي قناع الذهب حق السبا, وجهي كله صار ذهبي على نحاسي.
مادري ليه حاطين فيه كل اللمعة هادي يعني من جد لو وحدة تبغى وجهها يلمع تحط اضاءة وهي تتحكم بالمناطق مو كل الوجه يبرق, دااااخ
ذا بودي شوب صراحة حلو ما عليه اي ملاحضات سيئة بس اللي خلاني اهمله انه بشرتي مرا دهنية وحساسة, بستخدمه وجهي يبدأ يدهن بعد ساعات قليلة وبما انه عندي بدائل ثانية ركنته وندمت اني اشتريته اصلا
قوام ريفلون رغوي, وضغطة صغيرة تطلع كمية اكبر من اللازم
      دحين نجي للماركة اللي فعلا زعلانة انها ما ناسبتني
ديور 
الفاونديشن مرا خفيف ما فيلو تغطية خالص, استخدمته اول مرة باسفنجة البيوتي بلندر ما اداني تغطية فكرت ان الاسفنجة اتشربته رجعت جربته بالفرشة العادية نفس الشيء حتى حاولت اوزعه بيدي ما نفع لانه مائي خفيف 
لازم وجهي يكون صافي ما فيه اي حبوب او اثار عشان ينفعني او اني اغطي كل الحبوب بالكونسيلر وبعد ما استخدمه ارجع اغطي بالباودر ... الخ
انا ما احب اتحايل على الميك اب عشان يضبط معاي يا انه يناسبني واستخدمه على طول يا انه ما يكون مناسب اركنه وادور على بديل
ننتقل للميك اب بيز, لما جربته في المحل عجبني لكن التجربة كانت على يدي مو على وجهي , انا عموما ما احط فاونديشن من غير بيز وعندي كذا نوع بس حبيت اشتري هذا كإضافة للكوليكشن حقي لكن المشكلة انه لونه في الصورة هو لونه على الواقع ما يندمج لما استخدمه يعطيني بياض شديد ولوني ابيض اصلا فوجهي بيصير شاااااحب
اخر شيء القلوس اكثر واحد اعطيته فرص وما نجح, ثقيل على الشفايف لمن يكون فمي مقفول يكون شكله اوكي بس احرك شفايفي احسهم يلصقو في بعض والاقي صعوبة في الكلام بطريقة عادية واخر شيء يتجمع عند الاطراف
على فكرة الفاونديشن ما ينفع يترش على الوجه مباشرة بيرش في كل مكان, هنا حاولت ارش في منطقة صغيرة, لاحظو كيف رش لبعيد مع ان يدي مرا قريبة من الطاولة  
ننننننننكست
ايشادو بيز من ان واي اكس. مادري كيف قررو انه بيز؟؟؟ من جوا عبارة عن لمعة في شكل كريمي ابيض, ابدا ابدا ابدا ما ينفع حطيته على الجفن ولما حاولت ادمج الشدو كل ما احرك الفرشة يتحرك البيز نفسه مو الشدو, صار اللون في مكان غامق ومكان ما فيه, الخلاصة انه المفروض اي بيز ينشف عشان نقدر نورع عليه اللون هذا لا
بعده ماركة مايبلين في السريع
الايلاينر الكريمي غير ثابت
القلم الاسود اقل من نص ساعة يكون كله تحت العين 
 البودرة لو ما عندك قشور في الوجه تطلعك عندك 
الماسكرا فرشتها كبيرة مرا وما تعطي طول بس شوووووية كثافة وغير مضادة للماء

هذا حجم الماسكرا مقارنة باللي انا استخدمها على طول
التالي فرشة سيجما اف30
 انا من المعجبين بفرش سيجما خصوصا اف80 و اي25 ما استغني عنهم في اغلب اللوكات حقي
 لمن اشتريت المجموعة كانت كل الفرش تمام الا هادي كانت ريحتها خااايسة وشكلها باهت, قررت اني اغسلها قبل ما استخدمها عشان الريحة, بس بللتها وحطيت عليها غسول صار لون الرغوة والموية اسود بعد كم غسلة اللون الاسود خف كثير بس ما راح وكمان الريحة خفت شوية او انه الغسول المعطر غطى عليها !!!, المهم حطيتها تنشف ثاني يوم رحت المسها صار شعرها يتطاير لحاله وصارت ابهت من الاول كنها محروقة من فوق
هنا صورتها مع فرشة ريل تكنيك البديلة لها. شوفو الفرق كيف, سيجما ابدا ما استخدمتها وكلها منتوفة واللي جنبها استخدمتها كثير وغسلتها كثير لكن شكلها جديدة ما استخدمت
 اخر شيء مزيلات المكياج والتونر
مزيلات المكياج بطيئة وغير فعالة لازم امسح مرات عديدة, احتاج وقت اطول قطن اكثر ومجهود اكبر وضروري اغسل وجهي بعد استخدامهم لانهم يتركو البشرة مليانة زيوت ودهون, اللي لونه ازرق لما امسح فيه عيوني اكثر من مرة بيسببلي تحسس وتهيج حوالين العين
التونر ريحته مرررررا حلوة لكنه يسبب تهيج للبشرة الحساسة, اعتقد بسبب نسبة الحكول اللي فيه
اللي عندها حبوب في الوجه زيي تنسى انها تستخدمه
وبس هادي كل منتجات الميك اب اللي مركونة لحد الان
 التدوينة الجاية ان شاء الله بتكلم عن منتجات العناية اللي ما استخدمها
اذا جربتو اي حاجة من الاشياء اللي فوق ادوني ارائكم
سي يو سووووون 

1 comment:

  1. اهلا يا قمر تدوينة جميله
    مشكورة على المشاركة و المجهود
    انا جربت bb كريم تبع جارنية بشرتى مختلطه و دهنية فى الشتا تجف شوى و يظبط معاها و تبقى حلوة بس بالصيف يسيح
    عموما يعتبر كويس بالنسبه لسعره
    اختى تمدح الكونسيلر تقول خفف لها انتفتخ اللى تحت العين

    ReplyDelete