ريفيو مجموعة المكاديميا للشعر

السلام عليكم بنونات
صارلي فترة اسمع مدح للسما عن مجموعة المكاديميا للشعر قلت اجربه وكالعادة اشتريت السيت الصغير لاني ممكن ما احبه وما ابغى اخسر مبلغ كبير وفي الاخير اركنه جنب كل المنتجات اللي اشتريتها وما عجبتني
بنات قد ذكرت فوائد شراء منتجات احجامها صغيرة للتجربة في موضوع سابق
اقرؤوه هنا

 
المجموعة تلاقونها في محلات نزيه فيه عنده مجموعات ثانية كثير
السيت اللي اخذته فيه 6 منتجات تجي في شنطة صغيرة من البلاستيك عليها نفس رسمة المجموعة, انا رميتها على طول لانها ما عحبتني

  اول شيء الشامبو
رأيي فيه انه عادي جدا, ما لاحظت اي اختلاف في شعري منه, كمان ريحته مو اللي تجذب, اقدر اقول انها مقبولة لكن ينمل منها بسرعة, ريحة المجموعة كلها متشابهة تقريبا الا الزيت ريحته حلوة
هل ممكن اشتريه ثاني ؟؟؟ الغالب نعم, لانه مكتوب في موقعهم انه خالي من السولفات والبارابين وهذا شيء مشجع اني اخذ الحجم الكبير واستمر عليه, ممكن يعطي نتيجة حلوة في المستقبل مع الاستمرار
ثاني شيء البلسم
مادري كيف احكم عليه !!! عموما البلسم بالنسبالي مو للترطيب لان عندي منتجات ثانية ارطب فيها شعري بعد الاستحمام, لكن احتاجه لان شعري طويل ودائما يتشبك بعد الشامبو فأحط عليه بلسم يصير مرة لزج وزلق بس امرر اصابعي فيه يروح التشابك, وبصراحة البلسم هذا كانت نتيجته كأي بلسم ثاني من الدروق ستور,نفس الاستخدام ونفس النتيجة
هل ممكن اشتريه ثاني ؟؟؟ الجواب هو لا, لان فيه بدائل له بسعر ارخص وحجم اكبر ونفس الأداء والاهم من هذا كله ان ريحتهم احلى منه بكثييير 
 ثالث شيء من اليمين زيت ومن اليسار ليف ان كونديشنر
الزيت استخداماته متعددة, تقدرو تستخدموه قبل التصفيف او بعده على شعر ناشف او مبلول, قوامه ثقيل قطرة او اثنين تكفي الشعر كله, ريحته مررا حلوة, وكيف ما كانت طريقة الاستخدام يعطي نتائج روعة
اما الليف ان كونديشنر استخدامي له قليل جدا, وما راح ارجع اشتريه لان الزيت بديل افضل منه بالنسبة لي
نجي دحين للمفضل عندي, واللي مرررا مرررا حبيته وبشتري الحجم الكبير بكل تأكيد
ديب ريبير ماسك = ماسك الاصلاح العميق, يستخدم مرة او مرتين فققققط في الاسبوع, مكتوب انه نخليه من 5 الى 7 دقايق بس للامانة عمري ما حسبت الوقت اللي اتركه على شعري والغالب انه اكثر من 7 دقايق, يعطي ترطيب عميق, مهما شطفت الشعر احسه لسة لزج مو مثل البلسم يروح. الريحة مثل ما قلت مقبولة, لكن على ترطيبه ما عندي مانع لاني بعد الاستحمام استخدم منتجات ثانية ريحتها حلوة ومنهم الزيت اللي فوق 
اخر شيء يجي مع المجموعة مشط اسنانه واسعة, المفروض انه مصنوع من شيء متعلق بالمجموعة ولا مادري ايش لكنه كلام فارغ انا اشوفه مشط بلاستيك عادي جدا, استخدمته فترة لان اللي امشط فيه على طول كان ضايع, ما اقول انه سيء او اني اشتكيت منه اثناء الاستخدام لكنه عادي, واول ما لقيت المشط الخشب حقي ركنت هذا في الدرج ما طلع الى الان عشان اصوره
وبس هاذي تجربتي مع مجموعة المكاديميا
خلاصة رأيي انه مو كل المجموعة حلوة لكنها فريدة وتستحق التجربة بكل تأكيد
اذا جربتوها قولولي كيف النتايج معاكم
بااااااااااي






No comments:

Post a Comment